"Ўзбеккосмос" агентлиги ва унинг тизимидаги "Космик мониторинг ва геоахборот технологиялари маркази" мутахассислари томонидан фавқулодда вазиятлар соҳасида республиканинг ёнғинлар юзага келиши мумкин бўлган ҳудудларида, ёнғинларни дастлабки босқичларда космик мониторинг орқали аниқлашни йўлга қўйишга ёрдам берувчи, ҳар бир термал нуқтани кўрсатиб турадиган интерактив геоахборот тизими жорий этилди. Ушбу тизим космик маълумотларни мунтазам равишда янгилаш, янги термал нуқталарни аниқлаш, уларни ҳарорат кўрсаткичлари, вақти ва бошқа зарур бўлган маълумотлар асосида ёнғин содир бўлиши мумкин бўлган ҳудудлар ва содир бўлаётган ёнғинларни барвақт аниқлаш имконини беради. Бу ҳақида "Ўзбеккосмос" агентлиги матбуот хизмати хабар берди.

Платформа тақдимоти Фавқулодда вазиятлар вазирлиги биносида бўлиб ўтди. Унда соҳа мутахассислари тизимнинг имкониятлари, ундан фойдаланиш кўрсатмалари, маълумотларнинг янгиланиб борилиш вақтлари ва бошқа имкониятлари билан батафсил таништирилди.

Шуни алоҳида таъкидлаб ўтиш керакки, интерактив геоахборот тизими термал нуқталарни аниқлаш орқали фавқулодда вазиятларга тезкорлик билан жавоб бериш ва олдини олиш имконини берувчи кўмакчи платформа ҳисобланади.

• Ўзбеккосмос
• илм-фан
• kosmos