Ўзбекистонда ногиронлиги бўлган шахсларга ижтимоий ёрдам кўрсатиш, жамият ва давлатнинг сиёсий, иқтисодий, ижтимоий ҳаётида бошқалар билан бирга тенг, тўлиқ ва самарали иштирок этиши учун шарт-шароитлар яратиш бўйича тизимли ишлар қилинмоқда. Хусусан, олий таълим йўналишида ҳам бу каби фуқаролар эътиборсиз қолдирилмайди.

Уларга бу борада қандай кўмак кўрсатилади? Тошкент давлат юридик университети Юридик клиникаси ходими Имомали Туев бу бўйича тушунтиришлар берди:

“2020 йил 15 октябрдаги "Ногиронлиги бўлган шахсларнинг ҳуқуқлари тўғрисида"ги қонуннинг 40-моддасига кўра ногиронлиги бўлган шахслар учун олий таълим муассасаларида давлат гранти асосида абитуриентларни қабул қилиш умумий сонининг икки фоизи миқдорида қўшимча қабул квотаси ажратилади.

Агарда ногиронлиги бўлган шахслар учун ажратилган қўшимча квоталар бўйича ўқишга қабул қилинмаса, абитуриентлар тўплаган баллари билан таълимнинг ушбу йўналиши бўйича танловда умумий асосларда иштирок этади.

Ногиронлиги бўлган шахсларга магистратура босқичига кириш учун белгиланган имтиёзлардан яна бири бу хорижий тил сертификатининг талаб этилмаслигидир. 

Ўзбекистон Республикаси Президентининг 2022 йил 20 октябрдаги 407-сонли қарорига кўра, давлат олий таълим муассасаларининг магистратура мутахассисликларига ҳамда олий таълимдан кейинги таълим ихтисосликларига ўқишга қабул қилишда кўриш, эшитиш ва нутқида нуқсони бўлган шахслар томонидан хорижий тилни билиш бўйича миллий ёки унга тенглаштирилган халқаро сертификатни тақдим этиш талаб этилмайди. Ушбу имтиёз 3-гуруҳ ногиронлиги бўлган шахсларга нисбатан қўлланилмайди.

Магистратурага мустақил ҳужжат топшириш бўйича кўникмалар мавжуд бўлмаса, Ягона интерактив давлат хизматлари марказига мурожаат қилинса, бу масала ижобий ҳал этилади”.

• Imtiyoz
• Magistratura
• Ногиронлик
• Олий таълим