Москва вилоятининг Орехово-Зуево шаҳар округида 12 ёшли мактаб ўқувчиси ўлдирилди. Жиноятда гумонланаётган 15 ва 16 ёшли икки нафар қиз қўлга олинган. Бу ҳақда «Meduza» хабар берди.

Маълум қилинишича, 12 ёшли бола 26 август куни Кабаново қишлоғида бедарак йўқолган. Уни қидиришга кўнгиллилар ҳам жалб қилинган. 27 август куни боланинг жасади ташландиқ бинонинг подвалида кўплаб пичоқ жароҳатлари билан топилган.

Кўп ўтмай, жиноятда гумонланиб, 15 ва 16 ёшли икки нафар ўқувчи қиз қўлга олинган. Мазкур ҳолат юзасидан қотиллик бўйича жиноят иши қўзғатилган.

ОАВ ва Telegram-каналлар ҳуқуқни муҳофаза қилувчи органлардаги манбаларга таяниб, қизлар жиноятни олдиндан режалаштиргани, пичоқ ва қўлқоплар тайёрлагани ҳақида ёзмоқда. Улар ҳалок бўлган болани қишлоқдаги қўшниси сифатида танишган.

Хабарларга кўра, бола йўқолган куни қизлар уни «пиво ичиш» баҳонасида сайрга чақириб, ташландиқ бинога олиб борган. Айрим манбаларда улар қотиллик жараёнини телефонга тасвирга олиб, «видео челленж»ни бажаргани айтилмоқда. Бироқ бошқа манбаларда гумондорлар изларни қолдирмаслик учун телефонларини ўзлари билан олмагани ҳақида маълумот берилган.

Ҳалок бўлган боланинг онаси гумондорлар бошқа қотилликларни ҳам режалаштирган бўлиши мумкинлигини билдирган. Унинг сўзларига кўра, тергов версияларидан бири қизлар Жанубий Кореянинг «Кальмар ўйини» сериалидан таъсирланган бўлиши мумкинлигини назарда тутади.

Шунингдек, айрим манбаларда гумондорлардан бирининг хонасида сериал қаҳрамонлари тасвирланган плакатлар бўлгани ва унинг TikTok аккаунтида сериалдан зўравонлик саҳналари жойлаштирилгани айтилмоқда.

Бироқ мазкур маълумотларнинг бир қисми ҳозирча ҳуқуқни муҳофаза қилувчи органлар томонидан расман тасдиқланмаган. Тергов давом этмоқда.