2026 йилнинг январь–июнь ойларида 5 422 нафар Ўзбекистон фуқароси доимий яшаш мақсадида хорижий давлатларга кўчиб кетган. Бу ҳақда Миллий статистика қўмитаси маълум қилди.

Қайд этилишича, ушбу кўрсаткич 2025 йилнинг мос даврига нисбатан 129 нафарга ёки 2,3 фоизга камайган.

Хорижга доимий яшаш учун кўчиб кетганларнинг асосий қисми Қозоғистон ва Россия ҳиссасига тўғри келган. Жумладан, кўчиб кетганларнинг 83 фоизи Қозоғистонга, 14,1 фоизи Россияга йўл олган. Шунингдек, 0,8 фоизи Кореяга, 0,6 фоизи Қирғизистонга кўчиб кетган.

Ҳудудлар кесимида энг кўп кўчиб кетиш Қорақалпоғистонда қайд этилган — 1 899 нафар. Кейинги ўринларда Тошкент вилояти — 1 431 нафар ва Навоий вилояти — 1 203 нафар билан қайд этилган.

Шунингдек, Тошкент шаҳридан 492 нафар, Хоразмдан 79 нафар, Бухородан 59 нафар, Жиззахдан 50 нафар, Самарқанддан 48 нафар, Сирдарёдан 39 нафар, Намангандан 37 нафар, Фарғонадан 28 нафар, Андижондан 27 нафар, Қашқадарёдан 21 нафар ва Сурхондарёдан 9 нафар киши доимий яшаш учун хорижга кўчиб кетган.

Шу билан бирга, 2026 йилнинг биринчи ярмида хорижий давлатлардан Ўзбекистонга доимий яшаш учун 1 649 киши кўчиб келган.