Бугун Ўзбекистон Республикаси Олий судида 2025 йилда одил судловни амалга ошириш борасида амалга оширилган ишлар юзасидан матбуот анжумани бўлиб ўтди. Тадбирда суд тизимида олиб борилаётган ислоҳотлар, фуқаролар ҳамда тадбиркорлик субъектларининг ҳуқуқ ва қонуний манфаатларини суд орқали ҳимоя қилишга қаратилган чоралар ҳақида маълумот берилди.

Анжуманда таъкидланишича, мамлакатда “Инсон қадри” ғояси асосида амалга оширилган сиёсий-ҳуқуқий жараёнлар доирасида янги таҳрирдаги Конституция қабул қилинган бўлиб, унда фуқароларнинг ҳуқуқ ва эркинликлари ҳамда қонуний манфаатларини ҳимоя қилиш кафолатлари мустаҳкамланган.

Маълумотларга кўра, судга мурожаат қилиш билан боғлиқ жараёнлар тўлиқ рақамлаштирилган. Ариза топшириш, суд мажлисларида иштирок этиш, суд ҳужжатларини олиш ҳамда ишларнинг кўрилиш ҳолати ҳақида ахборот олиш Олий суднинг интерактив хизматлар портали орқали электрон шаклда амалга оширилмоқда.

Шунингдек, жиноят иш юритувида инсон ҳуқуқларини ҳимоя қилишни кучайтириш мақсадида 2025 йил 1 январдан бошлаб тергов судьялари институти жорий этилгани қайд этилди. Ҳозирда жиноят ишлари бўйича туман ва шаҳар судларида 263 нафар тергов судьяси фаолият юритмоқда.

Давлат органлари билан муносабатларда фуқаролар ва тадбиркорлик субъектларининг ҳуқуқларини ҳимоя қилишни такомиллаштириш мақсадида маъмурий суд ишларини юритиш тўғрисидаги қонунчиликни ривожлантириш концепцияси тасдиқланган.

Матбуот анжуманида суд тизимини рақамлаштириш, “Рақамли суд” ва “Ақлли суд” лойиҳаларини жорий этиш, суд инфратузилмасини яхшилаш ҳамда судьялар корпусини малакали кадрлар билан таъминлашга қаратилган Президент фармонлари ҳақида ҳам ахборот берилди.

Олий суд томонидан суд амалиётида юзага келаётган муаммолар доимий равишда таҳлил қилинаётгани, аниқланган камчиликларни бартараф этиш юзасидан норматив-ҳуқуқий ҳужжатлар лойиҳалари ишлаб чиқилаётгани маълум қилинди. Шу билан бирга, Олий суд Пленуми томонидан қонунчиликни қўллаш масалалари юзасидан қарорлар ва тушунтиришлар қабул қилинаётгани қайд этилди.

Матбуот анжумани якунида журналист ва блогерлар ўзларини қизиқтирган саволларга жавоб олди.

• Матбуот анжумани
• Олий суд