Бу ҳақда Numbeo халқаро таҳлилий платформаси маълумотларида келтирилган.

2026-йилги глобал яшаш қиймати рейтингига кўра, мамлакат 155 та давлат орасида 138-ўринни эгаллади. Бунда Нью-Йорк шаҳри 100 балл билан асос сифатида олинган бўлиб, кўрсаткич қанчалик паст бўлса, мамлакатда яшаш шунчалик арзон ҳисобланади.

Ўзбекистонда яшаш харажатлари индекси 27,3 баллни ташкил этган. Товар ва хизматлар умумий ҳисобда арзон бўлса-да, харид қобилиятининг ўртача даражада қолаётгани аҳолининг реал даромадлари чекланганини кўрсатади.

Жаҳонда арзонлик даражаси бўйича Тошкент 479 та шаҳар орасидан 431-поғонани банд қилган. Энг қиммат ҳудуд дея Швейсариянинг шимолий қисмидаги Цюрих шаҳри топилган.

Нумбео таҳлили асосий 5 йўналишда амалга оширилади. Унда Ўзбекистон қуйидаги натижаларни қайд этди:

– уй-жой ижара ҳақи – 12,2 балл (минтақадаги энг паст кўрсаткичлардан бири);

– уй-жой ижарасини ҳисобга олган ҳолда яшаш қиймати индекси — 20,6 балл;

– озиқ-овқат маҳсулотлари – 30,1 балл;

– ресторанлардаги нархлар – 23 балл;

– харид қобилияти – 47,8 балл.

Марказий Осиё давлатлари орасида мамлакат учинчи ўринда турибди. Умумий рейтингда Қозоғистон 128-ўрин, Тожикистон 136-поғона, Қирғизистон эса 140-ўринни эгаллаган. Туркманистон бўйича маълумотлар тадқиқотда келтирилмаган.

Дунёнинг ҳаёт кечириш энг қиммат ҳудудлари сифатида Бермуд, Кайман ороллари ва Виржин ороллари қайд этилган бўлса, Покистон, Ҳиндистон ҳамда Ливия яшаш харажатлари энг паст бўлган давлатлар қаторидан жой олган.

• Ўзбекистон
• рейтинг