15 октябрь куни Президент Шавкат Мирзиёев Саудия Арабистонининг етакчи компаниялари раҳбарлари билан учрашув ўтказди.

Бугунги кунда мамлакатлар ўртасидаги ҳамкорлик тарихий босқичга етди — қўшма лойиҳалар портфели 27 миллиард доллардан ошган, фақатгина жорий йилнинг ўзида эса 2 миллиард доллар инвестиция ўзлаштирилган.

Ҳамкорликнинг барча йўналишларида ўсиш кузатилмоқда:

– ўзаро савдо ҳажми ортиб бормоқда, мамлакатлар ўртасидаги авиақатновлар сони ҳафтасига 60 тадан зиёд бўлди;

– Янги босқич рамзи сифатида Тошкентда замонавий халқаро аэропорт қурилиши белгиланган бўлиб, у ҳам Саудия ҳамкорлари билан ҳамжиҳатликда амалга оширилади.

Эътибор марказида — келажак энергетикаси.

ACWA Power компанияси 15 миллиард долларлик лойиҳаларни амалга оширмоқда:

– шамол ва қуёш электр станцияларини барпо этиш;

– шунингдек, “яшил водород” ишлаб чиқариш йўналишини ривожлантирмоқда.

Бу нафақат соф энергияга қўшилган ҳисса, балки маҳаллий саноат ривожига ҳам кучли туртки бўлиб хизмат қилмоқда, чунки бундай лойиҳаларда ўзбек ишлаб чиқарувчилар маҳсулотлари фаол қўлланилмоқда.

Рақамлаштириш ҳамкорликнинг муҳим йўналишига айланмоқда.

Data Volt компанияси Тошкентда замонавий дата-марказ қуришни бошлаган, шунингдек Янги Тошкент ва Бухородаги шунга ўхшаш объектларни барпо этишни режалаштирмоқда.

Саудия Арабистони Ўзбекистоннинг стратегик конларига ҳам қизиқиш билдирмоқда. Бу — литий, графит, титан ва бошқа қимматбаҳо хомашё захираларини ўз ичига олади.

Самарқанд ва Тошкент вилоятларида ташкил этиладиган “Келажак металлари технопарки” доирасида юқори қўшилган қийматга эга маҳсулот ишлаб чиқариш йўлга қўйилади.

Инфратузилма соҳасидаги ҳамкорлик ҳам фаол ривожланмоқда. Саудиянинг Miahona компанияси чиқинди сувларни тозалаш ва сув таъминоти тизимини янгилаш лойиҳаларида, жумладан Қорақалпоғистондаги насос станцияларини модернизация қилиш ишларида иштирок этмоқда.

Саудия ишбилармон доиралари Янги Ўзбекистоннинг барқарор иқтисодий ўсиши ва инвестиция муҳитини юксак баҳолаб, ҳамкорликни кенгайтириш ва янги лойиҳаларни амалга оширишга тайёр эканини билдирдилар.

Ушбу ташаббуслар нафақат икки мамлакат ўртасидаги дўстлик ва ҳамкорликни мустаҳкамлайди, балки янги иш ўринлари яратилишига, замонавий технологиялар жорий этилишига ва аҳоли турмуш сифатининг ошишига ҳам хизмат қилади.

• Ҳамкорлик
• Ўзбекистон
• Саудия Арабистони