Қирғизистоннинг Хитой олдидаги давлат қарзи 1,4 миллиард долларни ташкил этмоқда. Бу ҳақда мамлакат молия вазири ўринбосари Умутжан Аманбаев 2025-йилги республика бюджети ижроси бўйича ҳисобот муҳокамаси вақтида маълум қилди.

Унинг таъкидлашича, аввал Хитой олдидаги қарз Қирғизистоннинг жами давлат қарзининг қарийб 40 фоизини ташкил этган. Ҳозирда эса бу кўрсаткич 27 фоизгача камайган.

Вазир ўринбосарига кўра, 2020 йилгача Хитойга бўлган қарздорлик мамлакат бюджетининг жами даромадларининг 90–100 фоизига тенг бўлган. Жорий йилнинг дастлабки етти ойи бўйича ҳисоб-китобларга кўра, ушбу қарз бюджет даромадларининг 16 фоизини ташкил этган.

Аманбаев мамлакатнинг бугунги молиявий ҳолати ташқи қарзларни ўз вақтида тўлаш имконини бераётганини таъкидлади. Унинг сўзларига кўра, кредитлар ҳозирда асосан ривожланиш лойиҳалари ва иқтисодий ўсишни таъминлаш учун жалб қилинмоқда.

2025 йилда Қирғизистон давлат қарзини тўлаш учун 77 миллиард сом йўналтирган. Ушбу маблағнинг қарийб 70 фоизи ташқи қарзларни қоплашга сарфланган. Молия вазири ўринбосари мамлакатда муддати ўтган қарздорлик мавжуд эмаслигини ҳам қайд этди.

Аввалроқ Қирғизистон Президенти Садир Жапаров мамлакат ташқи қарзини ҳатто бир кунда тўлаш имконияти борлигини билдирган эди. Унинг айтишича, 2020 йилда ташқи қарзнинг ялпи ички маҳсулотга нисбати 54 фоизни ташкил этган бўлса, 2025 йилга келиб бу кўрсаткич қарийб 25 фоизгача камайган.

Жапаров Қирғизистон 2035 йилгача аввал олинган кредитлар бўйича мажбуриятларини муаммосиз бажаришини таъкидлаган.

Маълумот учун, 2023 йилда Жапаров мамлакатнинг ташқи қарзидан воз кечиш эвазига Қирғизистонда энергетика объектларини қуришни таклиф қилган. 2024 йилда эса Туркия Президенти Ражаб Тоййиб Эрдўғон Қирғизистоннинг 58,9 миллион долларлик ташқи қарзидан воз кечган.