Қорақалпоғистонда йўловчи поезд юк машинаси билан тўқнашди. Бу ҳақда “Ўзбекистон темир йўллари” АЖ ахборот хизмати хабар берди.

Маълум қилинишича, ҳодиса кеча, 6 октябрь куни соат 15:31 да Тўрткўл ва Элликқалъа станциялари ўртасидаги 531-километрда жойлашган қўриқланмайдиган темирйўл кесишмасида содир бўлган. “Қўнғирот ‒ Андижон” йўналишидаги 128-сонли йўловчи поезди “КамАЗ” русумли юк машинаси билан тўқнашиб кетган. Юк машинаси темирйўл кесишма сигнал белгиларига қарамасдан ҳаракатланган.

Машина ҳайдовчиси шифохонага жўнатилган. Йўловчи поездида 216 нафар йўловчи бўлиб, уларнинг соғлиғига зарар етмаган. Тепловоз поездни олиб кетолмаслиги сабабли ЎзТЕ16М2 русумли 025 сонли тепловоз соат 16:15 да воқеа жойига жўнатилган.

Ҳодиса жойига тегишли раҳбарлар ва ҳуқуқни ҳимоя қилиш органлари ходимлари етиб борган. Ҳозирда суриштирув ишлари давом этмоқда.

• Halokat
• Қорақалпоғистон
• Темир йўл
• yuk mashinasi