Россия федерацияси божхона хизмати ва Россия хавфсизлик хизмати билан ҳамкорликда ўтказилган тезкор тадбирда Эквадордан катта миқдорда жўнатилган кокаин гиёҳвандлик воситаси контрабандаси фош этилди. Бу ҳақда “ТАCC” нашри хабар берди.

Маълумотларга кўра, бу 2025 йилда Лотин Америкасидан жўнатилган гиёҳванд моддаларининг энг йирик партияси бўлиб, унинг қиймати Россия қора бозорида 12 миллиард рублдан ошади.

“Чет эллик ҳамкасбларимизнинг бизга берган маълумотлари ўз тасдиғини топди ва Эквадордан юборилган бананларнинг навбатдаги партиясида яширин гиёҳванд моддалар аниқланди. Контейнерлардан бирининг полини текшириш пайтида 820 дона декларациядан ўтказилмаган брикетлар топилган ва олиб қўйилган. Экспертиза хулосасида эса, брикетларнинг ичига айнан кокаин моддаси беркитилганлиги аниқланди” – дейилади божхона қўмитаси берган расмий ахборотда.

Ҳозирда ушбу ҳолат бўйича Россия федерацияси жиноят кодексининг 229.1-моддаси, 4-қисм “Б” бандига мувофиқ жиноят иши қўзғатилди.

Россия қонунлари бўйича мазкур моддалар бўйича айбланаётган шахсларнинг тегишли айби исботланса, уларга нисбатан умрбод қамоқ жазоси ҳукми ҳам чиқарилиши мумкин.

• Божхона
• Эквадор
• Гиёҳвандлик
• Россия