Ўзбекистон Президенти Шавкат Мирзиёев Туркманистон Президенти Сердар Бердимуҳамедовнинг таклифига биноан 7–9-октабр кунлари амалий ташриф билан Туркманистонда бўлади. Ташриф доирасида давлат раҳбари «Аваза» миллий сайёҳлик зонасида Марказий Осиё ва Озарбайжон давлат раҳбарларининг саккизинчи Маслаҳат учрашуви ҳамда Мустақил Давлатлар Ҳамдўстлигининг навбатдаги саммитида иштирок этади.

Маслаҳат учрашувида сиёсий-дипломатик ҳамкорликни мустаҳкамлаш, савдо-иқтисодий алоқаларни чуқурлаштириш ва энергетика соҳасидаги шерикликни кенгайтириш масалалари муҳокама қилинади. Шунингдек, атроф-муҳитни муҳофаза қилиш, иқлим ўзгаришига мослашиш, маданият, таълим, илм-фан ва ёшлар ўртасидаги алоқаларни ривожлантириш бўйича қўшма чора-тадбирлар кўриб чиқилади.

Учрашувда минтақавий ва халқаро аҳамиятга молик долзарб масалалар, шунингдек, тинчлик, барқарорлик ва хавфсизликни таъминлашга оид устувор вазифалар юзасидан фикр алмашиш кўзда тутилган.

МДҲ давлат раҳбарлари кенгаши йиғилишида Ҳамдўстлик доирасидаги кўп томонлама ҳамкорлик якунлари сарҳисоб қилиниб, уни янада ривожлантириш истиқболлари муҳокама қилинади. МДҲ ташкил этилганининг 35 йиллигини нишонлашга алоҳида эътибор қаратилади.

Тадбирлар якунида қўшма ҳужжатлар тўпламини қабул қилиш, шунингдек, Шавкат Мирзиёевнинг қатор давлат раҳбарлари билан икки томонлама учрашувлар ўтказиши режалаштирилган.