18 май куни Исроилнинг Ғазо секторига берган зарбалари оқибатида камида 151 киши ҳалок бўлди.

Бу ҳақда Қатарнинг Al Jazeera телеканали хабар бермоқда.

Унга кўра, улардан 70 нафари Ғазо шаҳри ва Фаластин анклавининг шимолидаги ҳудудларни бомбардимон қилиш натижасида ҳалок бўлган.

Исроил Бош вазирининг маслаҳатчиси Дмитрий Генделман якшанба куни Исроил мудофаа кучлари Ғазо секторидаги ХАМАС ҳаракатини енгиш учун олиб борилаётган “Гидён аравалари” операциясининг ҳал қилувчи босқичига кирганини айтди.

“Қуруқликдаги кучлар Ғазо секторига чуқур кириб боряпти, ХАМАС тузилмаларига аниқ зарбалар бериб, муҳим позицияларни эгалламоқда. Ўтган ҳафта давомида авиация юзлаб нишонларга зарба берди, омборлар, туннеллар, ракета позициялари ва террорчиларни йўқ қилди”, – дея таъкидлаган у.

Аввалроқ Исроил анклавда очарчилик хавфининг олдини олиш учун Ғазо секторига озиқ-овқат етказиб беришга рухсат бериши хабар қилинган эди.

• Фаластин
• Isroil
• Қурбон
• Уруш