Жорий йил 14 май куни Тоғли Бадахшон автоном вилояти аҳолиси вилоят раҳбари Алишер Мирзонабот ва Хоруғ ҳокими Ризо Назарзоданинг истеъфосини талаб қилиб норозилик билдирирган, шунингдек, улар Хоруғдаги барча назорат-ўтказиш пунктларини олиб ташлаш ва Бадахшон аҳолисига нисбатан таъқибларни тўхтатишни талаб қилишган эди.

16 май куни эса Тожикистоннинг Тоғли Бадахшон аҳолиси Хоруғ шаҳри марказида митингга тўпланмоқчи бўлган ва уларга ҳуқуқ-тартибот идоралари тўсқинлик қилиши ортидан икки томон орасида тўқнашув келиб чиққан эди.

Бунга жавобан ҳукумат мазкур ҳудудда аксилтеррор операцияси ўтказилишини эълон қилди. Тожикистон ИИВнинг маълумотларига кўра, 200 нафар қуролли жиноятчилар гуруҳи Рушон вилояти марказидаги Душанбе-Хороғ автомагистрали ва чегара комендатурасини тўсиб қўйган.

Бир нафар ҳарбий хизматчи ҳалок бўлган, 13 нафари эса оғир тан жароҳатлари олган. Маҳаллий аҳолидан эса 20 нафарга яқини тўқнашувларда ҳалок бўлгани айтилмоқда.

“Агар Тожикистон ҳукумати Тоғли Бадахшон автоном вилоятидаги вазиятни ташқи террорчи кучлар беқарорлаштиряпти, деган фактни асослаб беролса, КХШТ ҳарбий кучларидан ёрдам олиши мумкин. Яъни, қўшни давлат ҳудудидаги вазиятни ҳал қилиш учун Коллектив ҳамкорлик шартномаси ташкилоти ўзининг ҳарбий кучларини киритиши мумкин”, – дейди хавфсизлик масалалари бўйича эксперт, Қирғизистон Миллий хавфсизлик қўмитаси раисининг собиқ ўринбосари Артур Медетбеков.

Унинг сўзларига кўра, Қозоғистондаги вазият ташкилот аъзолари учун мисол бўла олади.

“Тоғли Бадахшон автоном вилоятидан сўнгги бир неча кун давомида оммавий норозилик намойишлари ҳақида хабарлар келмоқда. Шунинг учун Тожикистонда Эмомали Раҳмон режимини сақлаб қолиш учун КХШТ қўлланилиши мумкин. Асосий масала: улар ростдан ҳам террорчиларми ёки ҳокимиятини сақлаб қолиш учун ўз халқини шундай аташаяптими? Шунга қарамасдан, тинч аҳоли орасида Афғонистондаги террорист ва экстремистлар билан алоқада бўлган наркогуруҳлар бўлиши мумкин”,– дейди Артур Медетбеков.

Бироқ, хавфсизлик бўйича экспертнинг қўшимча қилишича, агар ижтимоий кескинлик сақланиб турса, вазият бирламчи ҳал қилинганидан кейин ҳам келажакда такрорланиши мумкин.

Эслатиб ўтамиз, Тожикистон ИИВ уюшган жиноий гуруҳлар “барча турдаги қуролларни қўллаган ҳолда” Рушон тумани марказида уч нуқтада Душанбе-Хоруғ автомагистрали ва чегара комендатурасигача бўлган йўлни тўсиб қўйгани, “жиноий гуруҳлар аввалдан бу ҳаракатларни амалга оширишга тайёргарлик кўрган ва худди шу мақсадда хориждан қурол-яроғ ва ўқ-дорилар олиб келган”и ҳақида маълумот берган эди.

• КХШТ
• Намойиш
• Тоғли Бадахшон
• Тожикистон