Давлат хавфсизлик хизматининг Фарғона вилояти бўйича бошқармаси ходимлари томонидан божхона ва ички ишлар органларини жалб қилган ҳолда ўтказилган тезкор тадбирда, Тожикистон Республикасидан контрабанда қилинган гиёҳвандлик воситалари савдоси билан шуғулланувчи, 1984 йилда туғилган фуқаронинг Қўқон шаҳридаги яшаш хонадони кўздан кечирилганда хонадон ошхонасида 4 кг 572 гр “опий” ҳамда 1 кг 58 гр “гашиш” моддалари борлиги аниқланиб, процессуал тартибда расмийлаштириб олинган.

Шунингдек, унга тожикистонлик наркосавдогарлар WhatsApp мессенжеридан юборган геолокация орқали – муқаддам Данғара тумани ҳудудига яшириб кетилган 9 кг 980 гр “опий” моддаси олинган.

Бундан ташқари, унга гиёҳвандлик воситаларини қайта ишлаб, истеъмолга тайёр ҳолатга келтириш учун ёрдам берган, Қўқон шаҳрида истиқомат қилувчи, 1969 йилда тугилган шахс ўзининг яшаш хонадонида нарколаборатория ташкил қилганлиги аниқланиб, ундан ҳам 7 кг 226 гр “опий” моддаси олинган.

Бошқа ҳолатда эса Қўқон шаҳри ҳудудида ҳаракатланаётган, 1980 йилда тугилган маҳаллий фуқаро бошқарувидаги Lacetti русумли автотранспорт воситаси тўхтатилиб кўздан кечирилганда, унда муқаддам 34 минг АҚШ долларига сотиб олинган 5 кг 22 гр “опий” моддаси борлиги маълум бўлган.

Сўнгра тезкор тадбир давом эттирилиб, унга наркотик моддани сотган, 1985 йилда тугилган ҳамшаҳари ва унинг жиноий шериги бўлган – 1985 йилда тугилган Тожикистон Республикаси фуқароси қўлга олинади.

Шунингдек, тожикистонлик фуқаронинг Ўзбекистон туманидаги хонадонидан ҳам 2 кг 362 гр “опий” моддаси олинган.

Қўқон шаҳрида қайд этилган яна бир ҳолатда Nexia русумли автомашина тўхтатилиб, холислар иштирокида кўздан кечирилди ва унда йўловчи сифатида кетаётган, 1992 йилда тугилган фуқарога тегишли сумка ичида 982 гр “гашиш” моддаси борлиги маълум бўлган.

Аниқланишича, у гиёҳвандлик воситасини муқаддам тожикистонлик наркокурерлар томонидан Қўқон шаҳри ҳудудига яшириб кетилган хуфия жойдан олган.

Фарғона шаҳрида ўтказилган тезкор тадбирда эса 2000 йилда тугилган шахс Тожикистон Республикасидан олиб келинган 989 гр “гашиш” моддасини харидорга 150 млн сўмга сотган вақтида ашёвий далиллар билан ушланган.

Ҳозирда барча ҳолатлар юзасидан қонунбузарларга нисбатан Жиноят Кодексининг 246 ва 273-моддалари билан жиноят ишлари қўзғатилиб, “қамоқ” эҳтиёт чораси қўлланилиб, тергов ҳаракатлари олиб борилмоқда.

• ДХХ
• Гиёҳвандлик
• Жиноят
• Тожикистон
• savdo