Давлат хавфсизлик хизмати ва Ички ишлар органлари ходимлари ҳамкорлигида олиб борилган тезкор-қидирув тадбирлари натижасида уй шароитида гидропоника усулида гиёҳвандлик ўсимликларини етиштириб, интернет орқали сотиш билан шуғулланган шахс фаолиятига чек қўйилди.

Хусусан, 1996 йилда Тошкент шаҳрида туғилган, муқаддам судланган фуқаронинг М.Улуғбек туманида жойлашган кўп қаватли уйлардан биридаги вақтинчалик яшаш хонадони кўздан кечирилганда, пластик идишда сақланаётган гиёҳвандлик воситаси, 300 дона зип-пакет, изоленталар ҳамда электрон тарози борлиги маълум бўлди. Дастлабки суриштирув давомида у ўзининг онасига тегишли Тошкент туманидаги хонадонда гиёҳвандлик ўсимликларини етиштираётганлиги аниқланди.

Ушбу манзил кўздан кечирилганда 10 туп каннабис ўсимлиги, 1 туп қуритилган гиёҳвандлик воситаси, шунингдек, уларни парваришлашда фойдаланилган кимёвий воситалар ва электрон тарози ашёвий далил сифатида олинди.

Бошқа ҳолатда эса “Самарқанд-Хоразм” йўналишида ҳаракатланаётган Сobalt русумли автомашина Тупроққалъа тумани ҳудудида ДХХ ва ИИБ ходимлари томонидан тўхтатилиб, текширилди.

Натижада унда йўловчи сифатида кетаётган, Ургут туманида яшовчи 2003 й.т. шахсга тегишли 810 гр “опий” моддаси борлиги маълум бўлди. Аниқланишича, у қўшни давлатдан контрабанда қилинган ушбу гиёҳвандлик воситасини Хоразм вилоятига сотиш мақсадида олиб кетаётган бўлган. Ҳозирда унинг жиноий шерикларини аниқлаш бўйича чора кўрилмоқда. Ҳар икки ҳолат бўйича қонунбузарларга нисбатан жиноят ишлари қўзғатилиб, тергов ҳаракатлари олиб борилмоқда.

• ДХХ
• Гиёҳвандлик
• Тошкент
• Хоразм