Тошкент шаҳрининг Мирзо Улуғбек туманида 18 ёшли қиз ва 22 ёшли йигит уйини нарколаборатория айлантирганлиги аниқланди. Бу ҳақда Ички ишлар вазирлиги матбуот хизмати хабар берди.

Маълум қилинишича, 2007 йилда туғилган қиз ва 2003 йилда туғилган талаба йигит 2025 йил сентябрь ойидан буён Telegram мессенжери орқали кураторлар топшириқларига асосан прекурсорларни ташкил қилиш ва синтетик гиёҳвандлик воситаларини тайёрлаш билан шуғулланиб келган.

Ўтказилган тезкор тадбирда уларнинг уйидан 1 кг “мефедрон” синтетик гиёҳвандлик воситалари ҳамда нарколабораторияда фойдаланиш учун зарур бўлган асбоб ва ускуналар ашёвий далил сифатида олинган.

Тезкор тадбир давом эттирилиб, қўлга олинган талаба йигитнинг мобил телефонига келган геолокация бўйича йўналиш ташкил қилиниб, Янгиҳаёт туманидаги дала майдонида “закладка” усулида кўмиб кетилган 1 килограмм синтетик гиёҳвандлик воситалари аниқланган.

Шунингдек, Тошкент шаҳри ҳудудида геолокацияларга “закладка” усулда тарқатиб келган 9 нафар шахс гиёҳвандлик воситаларини олган вақтида ушланган.

Хабарга кўра, уларнинг 3 нафари пойтахтнинг нуфузли олий таълим муассасалари талабалари бўлган.

Мазкур ҳолат юзасидан ушбу жиноий гуруҳнинг аъзоларига нисбатан Жиноят кодексининг 273-моддаси (гиёҳвандлик воситалари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 3-қисми “б” банди билан жиноят иши қўзғатилган.

• Гиёҳвандлик
• ИИВ
• Жиноят
• Талабалар
• Тошкент