АҚШ президенти Доналд Трамп Дания, Норвегия, Швеция, Франция, Германия, Буюк Британия, Нидерландия ва Финляндияга қарши савдо божлари жорий этилишини эълон қилди.

Президентнинг сўзларига кўра, 2026 йил 1 февралдан ушбу давлатлардан Қўшма Штатларга келтириладиган барча маҳсулотларга 10 фоизлик бож солинади, 1 июндан эса бож 25 фоизгача оширилади. Трампнинг таъкидлашича, чекловлар АҚШ томонидан Гренландияни “тўлиқ ва якуний тарзда сотиб олиш” бўйича келишувга эришилмагунча амал қилади.

Трамп ўз баёнотида АҚШ “кўп йиллар давомида” Дания ва Европа Иттифоқи мамлакатларини тарифлар жорий этмасдан субсидиялаб келганини, энди эса “қарзни қайтариш вақти келгани”, чунки “бутун дунёдаги тинчлик хавф остида тургани”ни таъкидлаган. У, шунингдек, Россия ва Хитой Гренландия устидан назорат ўрнатишга интилаётганини, Дания эса оролни ҳимоя қилишга қодир эмаслигини айтиб ўтган.

Трамп саккиз Европа давлатини “хавфли ўйин” ўйнашда айблаб, уларнинг Гренландияга “номаълум мақсадларда” ўз ҳарбийларини юборишини бунга мисол қилиб кўрсатган.

Трамп яна Гренландияни сотиб олиш заруратини “Олтин гумбаз” ракетага қарши мудофаа лойиҳаси билан боғлаб, орол устидан назорат бўлмаса, тизим географик омиллар сабаб “максимал самарадорлик билан” ишлай олмаслигини таъкидлаган.

• АҚШ
• Буюк Британия
• Дания
• Davlat boji
• Finlandiya
• Fransiya
• Германия
• Gollandiya
• Норвегия
• Швеция
• Трамп