Республика ихтисослаштирилган травматология ва ортопедия илмий-амалий тиббиёт марказида 2025 йилда бу йўналишда қатор янгиликлар жорий этилиши кутилмоқда.

“Муассасамизда “робот жарроҳлиги”ни йўлга қўйиш, хусусан, ушбу амалиётни тизза бўғимлари касалликларини даволаш жараёнида қўллашни режалаштирганмиз”, – дейди марказ директори Мурод Ирисметов.

Мазкур янгилик шифокорга инсон танасининг энг мураккаб қисмлари ҳамда касалликнинг энг оғир даражаларида хам эркин ишлаш имконини беради.

Натижада махсус дастур ёрдамида мураккаб амалиётлар чоғида юзага келиши мумкин бўлган хирургик хатоликларнинг олди олинади.

Илғор диагностика ва муолажа усулларини босқичма-босқич туманларда ҳам жорий қилинмоқда. Жумладан, шу йил давомида туман (шаҳар) шифохоналарида 2 та янги диагностика ва 8 та даволаш усули амалиётга татбиқ этилади.

Ўзбекистоннинг 48 та тумани ва 10 та шаҳарларида сон суяги дистал охири синиқларини ретроград BIOS қилиш, чаноқ-сон ва тизза бўғимларини тотал эндопротезлаш, сон суяги проксимал охири синиқларини янги моделдаги BIOS INTERTAN билан остеосинтезлаш, буцимон бойламлар жароҳатининг артроскопик аутопластикаси, PRP терапия, АО пластиналари билан остеосинтез қилиш усуллари ўзлаштирилади.

Натижада беморларнинг ортиқча вақт ва маблағ сарфлаб, хорижий давлатлар ёки пойтахтимиз ва вилоятлар марказларига узоқ туманлардан қатнови 10 фоизга камаяди.

Бундан ташқари, бевосита марказ мутахассислари томонидан ҳудудларда 6 мингга яқин тиббий кўриклар, 300 дан зиёд юқори технологик операциялар ўтказилади.

Бухоро, Самарқанд, Фарғона, Тошкент ва Навоий вилоятларида сайёр цикллар ташкил қилиниб, маҳаллий мутахассисларни ўқитиш орқали чақалоқларда чаноқ-сон бўғими дисплазиясини УТТ ёрдамида диагностика қилиш усули йўлга қўйилади.

Ўз навбатида, Хитой, Россия, Германия, АҚШ, Жанубий Корея, Туркия, Беларус, Ҳиндистон каби қатор ривожланган давлатлардан малакали мутахассисларнинг мамлакатимизга ташрифи амалга оширилиб, улар иштирокида жойларда маҳорат дарслари, тиббий кўриклар ва қўшма операциялар ўтказилиши режалаштирилган.

• Жарроҳлик
• Ўзбекистон
• SSV
• Янгилик