Ижтимоий тармоқларда Тошкент шаҳар Фарҳод бозори яқинидаги туннелда номаълум эркак бир аёлга нисбатан уятсиз ҳаракатлар қилгани ҳақида видео тарқалди ва ушбу ҳолат жамоатчилик орасида турли муҳокамаларга сабаб бўлди. Мазкур ҳолатга Тошкент шаҳар Ички ишлар бош бошқармаси муносабат билдирди.

Маълум қилинишича, кеча, 6 январь куни тахминан соат 18:50 ларда номаълум шахс Учтепа тумани Лутфий кўчасида 1996 йилда туғилган Л.Қ.га нисбатан уятсиз, бузуқ ҳаракат қилган ҳолда воқеа жойидан қочиб кетган.

Мазкур ҳолат юзасидан Тошкент шаҳар ИИББ томонидан ўтказилган тезкор-қидирув тадбирлари натижасида эркакнинг шахси аниқланган. Маълум бўлишича, у 1993 йилда туғилган В.Андрей бўлиб, ички ишлар органлари ходимлари томонидан ушланган. Ҳозирда Учтепа тумани ИИО ФМБ томонидан терговга қадар текширув ўтказилмоқда. Текширув якуни бўйича қонуний қарор қабул қилиниши таъминланади.

Ушбу шахснинг ножўя хатти-ҳаракатларидан жабр кўрганлардан 71-231-95-20 рақамига ёки 102 қисқа рақамига мурожаат қилиш сўралади.

• Аёллар
• Тошкент
• туннель