Россия президенти Владимир Путин сешанба куни Москвада Куба президенти Мигел Диас-Канел Бермудес билан учрашади.

Келтирилишича, икки давлат раҳбарлари халқаро кун тартибидаги асосий масалалар юзасидан фикр алмашиши ҳамда сиёсий, савдо-сотиқ ва Россия-Куба стратегик шериклигининг ҳозирги ҳолати ва уни янада ривожлантириш истиқболларини муҳокама қилишади.

Кремл матбуот котиби Дмитрий Песков Куба Россия Федерациясининг ўта муҳим ҳамкори эканлигини ва президентлар “кўп нарса ҳақида гаплашиши”ни таъкидлади.

Жорий йилнинг 22 ноябр санасида президентлар Москва шимолида Фидел Кастро ҳайкали очилиш маросимида ҳам қатнашади.

Бу йил Россия ва Куба президентлари йилига икки марта - январ ва октябрда телефон орқали гаплашган.

Душанба куни Куба президенти Россия Федерацияси Хавфсизлик кенгаши раиси ўринбосари Дмитрий Медведев билан учрашганида, Россия ва Куба учун Ғарб томонидан жорий этилган санкциялар доирасида мулоқотни давом эттириш ва тажриба алмашиш фойдали эканини таъкидладилар.
Медведев ҳеч қандай санкциялар Куба ва Россия Федерациясининг ривожланишини тўхтата олмаслигини алоҳида таъкидлаган.

Маълумот учун, Мигел Диас-Канел Бермудес 19 ноябр куни Москвага келди. Куба Президенти Россияга сафари Гавана ва Москва ўртасидаги ўзаро манфаатли соҳалардаги ҳамкорликни мустаҳкамлашга ёрдам беришига ишонч билдирган. Куба раҳбари хорижий сафари давомида Жазоирга ҳам ташриф буюрган, Россиядан кейин Туркия ва Хитойга бориш ниятида.

• АҚШ
• Куба
• Россия