Эрон ташқи ишлар вазири Аббос Ароқчи Mehr агентлигига берган интервьюсида мамлакат ракета дастури ва ядровий фаолияти бўйича позициясини аниқ билдирди. Унинг таъкидлашича, Теҳрон халқаро босимларга қарамай, уранни бойитишни давом эттиради ва ракета салоҳиятини чекламайди.

“Биз ракета дастуримиз бўйича музокара юритмаймиз. Бирон ақлли инсон уни йўқ қилишга рози бўлмайди. Уранни бойитишни тўхтата олмаймиз. Ҳарбий йўл билан эришиб бўлмаган нарса сиёсий босим орқали ҳам амалга ошмайди”, — дейди Ароқчи.

Шу билан бирга, у Вашингтон билан ядровий дастур бўйича хавотирларни бартараф этиш юзасидан музокаралар ўтказиш эҳтимолини инкор этмади.

“Биз бевосита эмас, балки билвосита мулоқот орқали келишувга эришишимиз мумкин”, — деган вазир.

Унинг берган маълумотига кўра, Исроил ва АҚШ ҳаво ҳужумларидан сўнг айрим ядровий объектлардаги материаллар “бомбардимон қилинган бинолар остида қолган ва бошқа жойга кўчирилмаган”.

Эслатиб ўтиш жоиз, 13–24 июнь кунлари Эрон ва Исроил ўртасидаги 12 кунлик урушда Исроил авиацияси Теҳроннинг асосий ядровий иншоотларига зарба берган эди. 22 июнда АҚШ ҳам операцияга қўшилиб, Фордо, Натанз ва Исфаҳон ядровий марказларига ҳужум қилган. Вашингтон маълумотларига кўра, бу зарбалар Эроннинг ядровий дастурига жиддий зарар етказган.

Шундан сўнг Эрон сиёсий кенгаши вакили Саййид Муҳаммад Садр Россияни Исроилга Эроннинг ҳаво ҳужумидан ҳимоя тизими ҳақида маълумот берганликда айблаб, Москва билан иттифоқни “фойдасиз” деб атаган эди.

2015 йилда эса Эрон ядровий қурол яратишдан воз кечиб, Атом энергияси халқаро агентлиги (АЭХА) инспекторларини қабул қилишга рози бўлган, эвазига чекловлар бекор қилинган эди. Бироқ 2025 йил август ойида Британия, Германия ва Франция Эроннинг келишувни бузганини таъкидлаб, санкцияларни қайта жорий этди.

• Босим
• Eron
• Санкция
• Ядровий қуроль