Хитой шанба куни мамлакат жануби-ғарбидаги Тибет автоном туманида, Ярлунг-Сангпо дарёси қуйи оқимида умумий сармояси қарийб 1,2 триллион юань (тахминан 167,2 миллиард доллар) бўлган гидроэлектростанция қурилишини расман бошлади, дейилган Хитой Халқ Республикаси Давлат кенгаши сайтида берилган баёнотда.

Лойиҳа беш каскадли ГЕСдан иборат. Ишлаб чиқарилган қувват биринчи навбатда ташқи истеъмол, шунингдек Тибетнинг ўзида маҳаллий талабни қондириш учун етказиб берилади.

Ҳозир ер юзидаги энг улкан ГЕС ушбу мамлакат марказий қисмидаги Хубей провинциясида, Янсзи дарёсида жойлашган “Санся” (Уч дара) мажмуаси ҳисобланади. 2008 йил октябрда ишга тушган “Санся” 22,4 миллион киловатт қувватга эга.

Маҳаллий матбуот аввалроқ Тибетда бунёд қилиниши режалаштирилаётган янги ГЕСнинг қуввати 60 миллион киловаттни ташкил этиши, ишлаб чиқариладиган йиллик қувват 300 миллиард киловатт-соатга етишини ёзганди. Демак, янги иншоот “Санся” ГЕСидан қарийб уч баробар юқори қувватга эга бўлади.

Мазкур улкан лойиҳа Ҳиндистон расмийларини хавотирга солмоқда. Январь ойи бошида ушбу давлат ташқи ишлар вазирлиги расмий вакили Рандхир Жайсвал мазкур бунёдкорлик ташаббуси жараёни диққат билан кузатиб борилаётгани айтиб, Пекинни бундай иншоот қуришда Деҳли ва бошқа минтақалар манфаатини бузмасликка чақирган.

Узунлиги 1 700 метрга чўзилган Ярлунг-Сангпо дарёси Тибет жануби-ғарбидаги Кайлаш тоғи яқинидаги Жима Янгзонг музлигидан бошланиб, Ҳиндистондаги Синг дарёсига, сўнгра Брахмапутрага қуйилади, шундан сўнг Бангладешга етиб боради.

• GES
• Матбуот
• Tibet
• Хитой