Turkiyalik 21 yoshli model Dilxan Divrikli Tailandda o‘tkazilgan Mister Global 2026 xalqaro erkaklar go‘zallik tanlovida g‘olib bo‘ldi. Bu haqda “Türkiye Today” nashri xabar berdi.

Tanlov finali 10-oktyabr kuni Bangkok yaqinidagi Nontxaburi shahrida bo‘lib o‘tdi. Unda turli mamlakatlardan kelgan ishtirokchilar bosh sovrin uchun bellashdi. Final oldidan qatnashchilar qariyb 10 kun davomida maxsus oromgohda bo‘lib, taqdimotlar, fotosessiyalar va turli sinovlarda ishtirok etdi.

Hakamlar hay’ati yakunda Dilxan Divriklini g‘olib deb topdi. Nigeriyalik Betel Mbamara ikkinchi, filippinlik MJ Ordilyano esa uchinchi o‘rinni egalladi.

Ma’lum qilinishicha, Divrikli Bryusselda yashaydi, uning oilasi esa Turkiyaning Afyonkarahisar viloyatidan. U to‘rt tilni biladi va avval Turkiyada o‘tkazilgan Top Model of Türkiye tanlovida ham g‘olib bo‘lgan.

Model modellikdan tashqari, kino san’atiga ham qiziqadi va kelajakda aktyorlik faoliyatini boshlashni rejalashtirmoqda.

Ma’lumot uchun, Mister Global xalqaro erkaklar go‘zallik tanlovi 2014-yildan beri o‘tkazib kelinadi.