O‘zbekistonda energetika sohasining 2050-yilgacha bo‘lgan Milliy bosh rejasi ilk bor ishlab chiqilib, jamoatchilikka ochiq e’lon qilinadi. Rejaga muvofiq, kelgusi yil 1-martgacha tarmoqlarga ulanish imkoniyatlari xaritasi, 1-iyulga qadar esa to‘liq bosh reja taqdim etiladi.

Mazkur hujjatlarda hududlar kesimida elektr energiyasiga talabning o‘sishi, zarur infratuzilma hamda yangi ishlab chiqarish quvvatlarini joylashtirish imkoniyatlari aks ettiriladi. Bu investorlar uchun uzoq muddatli rejalarni shakllantirish va loyihalarni oldindan rejalashtirishga xizmat qiladi.

Shuningdek, qayta tiklanuvchi energiya ishlab chiqaruvchilar uchun sertifikatlar va karbon kreditlari orqali qo‘shimcha daromad olish imkoniyatlari yaratiladi. Ushbu faoliyatdan olinadigan manfaatni davlat va investorlar o‘rtasida adolatli taqsimlash mexanizmlari joriy etiladi.

Mazkur jarayonda O‘zbekistonning xalqaro ekologik majburiyatlari va amaldagi shartnomalari to‘liq hisobga olinishi belgilangan. Milliy bosh reja energetika sohasini uzoq muddatli rivojlantirish va investitsiya loyihalarini rejalashtirish uchun asos bo‘lib xizmat qiladi.