O‘zbekiston hududida 25-yanvar—1-fevral kunlari havo asosan o‘zgaruvchan bo‘lib, ko‘p hududlarda yog‘ingarchilik kutilmaydi.

Qoraqalpog‘iston Respublikasi va Xorazm viloyatida hafta davomida asosan quruq ob-havo saqlanadi, faqat 26—28-yanvar (Xorazmda 27—28-yanvar) kunlari ayrim joylarda qor yog‘ishi mumkin. Ushbu kunlarda ba’zi hududlarda tuman tushishi, yo‘llarda yaxmalak kuzatilishi ehtimoli bor. Shamol tezligi 7–12 metr/sekund bo‘lib, harorat kechalari 6–11 daraja sovuq, kunduzi esa 3 daraja sovuqdan — 5 daraja iliqqacha bo‘ladi.

Buxoro va Navoiy viloyatlarida 25-yanvarda ayrim joylarda yomg‘ir va qor ko‘rinishidagi yog‘ingarchilik kuzatilishi mumkin. 26-yanvar kuni asosan yog‘ingarchiliksiz bo‘lishi, Navoiy viloyatining shimolida esa ayrim hududlarda qor yog‘ishi ehtimoli saqlanib qoladi. 27—28-yanvar kunlari ba’zi joylarda qor yog‘adi, 29-yanvar–1-fevral oralig‘ida esa yog‘ingarchilik kutilmaydi. Shamol 25-yanvarda ayrim hududlarda 15–20 metr/sekundgacha kuchayadi, havo harorati kunduzi 5–12 daraja iliqqacha ko‘tariladi.

Toshkent, Samarqand, Jizzax va Sirdaryo viloyatlarida 25-yanvarda ayrim joylarda biroz yog‘ingarchilik bo‘lishi mumkin, 26-yanvar kuni esa asosan quruq ob-havo kuzatiladi. 27—28-yanvar kunlari ayrim hududlarda qor yog‘adi, 29-yanvar—1-fevralda yog‘ingarchilik kutilmaydi. Shamol tezligi ba’zi joylarda 22–25 metr/sekundgacha kuchayishi mumkin. Harorat kechalari 3 daraja sovuqdan — 5 daraja iliqqacha, kunduzi esa 1–12 daraja iliqqacha o‘zgaradi.

Qashqadaryo va Surxondaryo viloyatlarida 25-yanvarda, shuningdek, 27—28-yanvar kunlari ayrim joylarda yomg‘ir va qor yog‘ishi mumkin, 29—yanvar—1-fevral oralig‘ida esa yog‘ingarchilik kutilmaydi.

Andijon, Namangan va Farg‘ona viloyatlarida hafta davomida asosan quruq ob-havo kuzatiladi, faqat 27—28-yanvar kunlari ayrim hududlarda qor yog‘ishi ehtimoli bor. Tog‘li hududlarda esa 25 va 27—28-yanvar kunlari qor yog‘adi, 25–26-yanvar kunlari qor ko‘chishi xavfi mavjud bo‘lib, yo‘llarda yaxmalak kuzatilishi mumkin.

• Ob-havo
• O‘zgidromet