50 yoshdan oshgan ayollar salomatligini saqlash va hayot sifati yuqori bo‘lishi uchun muntazam tibbiy tekshiruvlardan o‘tib turishi lozim. Sababi bu yoshda ular ko‘plab kasalliklar va salomatlik muammolariga duch kelish xavfi ostida bo‘ladi. Shu sababli bu yoshda o‘z vaqtida diagnostika va profilaktika muhim ahamiyatga ega.

 Quyida 50 yoshdan oshgan ayollar uchun tavsiya qilinadigan asosiy tibbiy tekshiruvlar haqida ma’lumot beramiz.

1.Ko‘krak bezi saratoni skriningi

Ko‘krak bezi saratonini o‘z vaqtida aniqlash juda muhim. Shu bois 50 yoshdan oshgan ayollar uchun har yili bir marta mammografiya tekshiruvidan o‘tish tavsiya etiladi. Agar oilada ko‘krak bezi saratoni bilan og‘riganlar bo‘lsa, bu tekshiruvni tez-tez o‘tkazish kerak.

2.  Bachadon bo‘yni saratoni skriningi

Ushbu tekshiruv o‘lim darajasi yuqori bo‘lgan eng xavfli kasalliklardan biri — bachadon bo‘yni saratonini erta aniqlashga yordam beradi. Biroq ayrim ayollar bu tekshiruvni e’tiborsiz qoldiradi.

Qayg‘uli oqibatlar ko‘pincha bemorlar o‘z vaqtida ko‘rikdan o‘tmaganligi sababli yuzaga keladi. Kolposkopiya bachadon bo‘yni o‘smalarini tashxislash uchun qo‘llaniladi.

3. Osteoporoz diagnostikasi

Menopauza boshlanishi bilan ayollarda osteoporoz (suyaklarning mo‘rt bo‘lishi) xavfi ortadi. Xastalikni erta bosqichda aniqlash imkonini beruvchi eng samarali tekshiruv suyak densitometriyasidir (suyak zichligini o‘lchash). 50 yoshdan keyin har yili ushbu tekshiruvdan o‘tib turish foydali.

4. Qon bosimi nazorati

Menopauza va u bilan bog‘liq o‘zgarishlar tufayli ayollarda gipertoniya rivojlanishi juda keng tarqalgan. Agar u nazorat ostida bo‘lmasa, xavfli yurak-qon tomir patologiyalari vujudga kelishi mumkin.

5. To‘liq gormonal tekshiruv

Estrogen va testosteron yillar davomida o‘zgarib turadigan asosiy gormonlardir. Biroq boshqa gormonlarni ham muntazam tekshirib turgan yaxshi. Chunki ularning muvozanati metabolizm, miya faoliyati, ishtaha, tana harorati va boshqalarga ta’sir qilishi mumkin.

6. Qonda shakar va xolesterin miqdorini aniqlash

Qonda glyukoza darajasini tekshirish ikkinchi toifa qandli diabetni aniqlashga yordam beradi. Bu ko‘pincha 40-50 yoshdan keyin tashxis qilinadi.

Yomon xolesterin (LDL) uchun o‘z vaqtida va muntazam ravishda qon tahlilini topshirish infarkt va insultning sababi bo‘lgan ateroskleroz (tomirlarning devorlarida blyashka shakllanishi) rivojlanishining oldini oladi.

7. Ko‘z va eshitish tekshiruvlari

Ko‘z va eshitish qobiliyatini saqlash uchun oftalmolog va otorinolaringolog ko‘rigidan o‘tib turish zarur. Ko‘rish va eshitish darajasida o‘zgarishlar aniqlansa, tezda mutaxassisga murojaat qilish tavsiya etiladi.

• Maslahat