Hindiston Bosh vaziri Narendra Modi Afrika Ittifoqini G20'ga doimiy aʼzo sifatida qabul qilingani bilan tabrikladi.

"Hindiston Afrika Ittifoqini G20'ning doimiy a'zosiga aylantirishni taklif qilmoqda va ishonchim komilki, barcha a'zolar bu taklifga rozi bo'lishadi. Barchangizning qo'llab-quvvatlashingiz bilan Afrika Ittifoqini G20'ga qo'shilishga taklif qilaman", - dedi Modi G20 sammitining birinchi sessiyasidagi o'z chiqishida.

Modining soʻzlaridan soʻng Hindiston Tashqi ishlar vaziri Subramanian Jaishankar Komor orollari prezidenti va Afrika ittifoqi raisi Azali Assumanining oldiga bordi va uni G20 aʼzolari uchrashadigan stolga kuzatib qoʻydi va uning oldida Afrika Ittifoqi belgisi va bayrogʻini qoʻydi. Bu faqat tashkilotga to‘laqonli a’zolar uchun qilinadi.

Joriy yilning iyun oyida Hindiston bosh vaziri Narendra Modi G20 yetakchilariga xat yozib, Afrika Ittifoqiga guruhning to‘liq a’zoligini berishni taklif qilgan. Oʻz navbatida, Rossiya prezidenti Vladimir Putin Rossiya Federatsiyasi Afrika Ittifoqining yetakchi xalqaro uyushmalar bilan bogʻlanishini qoʻllab-quvvatlashini, Afrikaga G20 aʼzoligini berish tashabbusini birinchilardan boʻlib qoʻllab-quvvatlashini, Moskva bu qaror qabul qilinishini kutayotganini aytdi. Kecha Nyu-Dehlida o‘tkazilgan G20 sammitida ko'pgina boshqa davlatlar va uyushmalar, jumladan, YeI ham ushbu qarorni qo'llab-quvvatladi.

Katta yigirmatalikda Afrika Ittifoqi - Afrika qit'asining 55 ta davlatini birlashtirgan tashkilot - tashkilotda YeI bilan bir xil maqomga ega bo'ladi.

Hindiston 2022-yil 1-dekabrdan boshlab G20'ga raislik qiladi. Guruh yetakchilari sammiti 9-10-sentabr kunlari Nyu-Dehlida bo‘lib o‘tadi. Unga Katta Yigirmalik davlatlari hamda yana to'qqizta davlat - Bangladesh, Misr, Ispaniya, Mavrikiy, Nigeriya, Niderlandiya, Birlashgan Arab Amirliklari, Ummon va Singapur rahbarlari taklif etilgan.

• Afrika Ittifoqi
• G20
• Hindiston