4-oktyabr kuni Centrum Air aviakompaniyasining C6 316 Istanbul–Farg‘ona reysida uchgan yo‘lovchilarning 99 ta bagaji Istanbulda qolib ketdi. Holat yuzasidan ijtimoiy tarmoqlarda yo‘lovchilarning murojaatlari tarqalgan, aviakompaniya esa vaziyatga munosabat bildirgan.

Aviakompaniya ma’lumotiga ko‘ra, havo kemasiga yuk ortishda ekspluatatsion cheklovlar joriy etilgan. Qaror parvozlar xavfsizligi talablariga muvofiq qabul qilingan. Kompaniya yo‘lovchilardan uzr so‘rab, bagajlarni imkon qadar tezroq yetkazib berish choralarini ko‘rayotganini ma’lum qilgan.

Dastlabki ma’lumotlarga ko‘ra, yo‘lovchilarning bagajlari 5-oktyabr kuni soat 22:00 da Farg‘ona aeroportiga yetkazilishi rejalashtirilgan. Aviakompaniya yo‘lovchilardan bagaj birkalarini saqlab qolishni so‘ragan. Masala yuzasidan Farg‘ona aeroportining bagaj bo‘limiga murojaat qilish mumkin.

Ma’lumot uchun, avval ham Centrum Air reyslarida kechikish va boshqa muammolar yuzaga kelgani haqida xabarlar berilgan. Jumladan, 17-sentyabr kuni C6 302 Istanbul–Toshkent reysi uch soatdan ortiq kechikkani, shuningdek, texnik nosozlik sabab Qozon–Toshkent reysi 27 soatga kechiktirilgani ma’lum qilingan.