“Navoiy kon-metallurgiya kombinati” AJ 2026-yilning birinchi yarim yilligi uchun moliyaviy hisobotini e’lon qildi. Unga ko‘ra, kompaniyaning olti oylik sof foydasi 2 mlrd 382 mln dollarni tashkil etib, 2025-yilning shu davriga nisbatan 57,2 foizga oshgan.

Hisobot davrida NKMKning sof tushumi 7 mlrd 67 mln dollarga yetgan. Bu ko‘rsatkich o‘tgan yilning birinchi yarim yilligiga nisbatan 49,9 foizga yuqori. Kompaniya o‘sishning asosiy omili London qimmatbaho metallar birjasida oltin narxining sezilarli oshishi bo‘lganini ma’lum qilgan.

Shu bilan birga, oltin ishlab chiqarish hajmi 1,51 mln troy unsiyani tashkil etib, 2025-yilning mos davriga nisbatan 1,8 foizga kamaygan. Bir unsiya oltin ishlab chiqarish tannarxi esa 1 647 dollarga yetgan. Bir yil avval bu ko‘rsatkich 1 164 dollarni tashkil qilgan.

Kompaniya tannarx oshishini, jumladan, oltin narxi yuqorilagani sababli royalti to‘lovlarining ko‘payishi, inflyatsiyaning materiallar qiymatiga ta’siri va “Muruntov” konidagi investitsion loyiha xarajatlarining ortishi bilan izohlagan. Shuningdek, so‘mning AQSH dollariga nisbatan 6,1 foizga mustahkamlanishi bir unsiya oltin ishlab chiqarish tannarxining 101 dollarga oshishiga ta’sir qilgan.

NKMK dunyodagi yirik oltin ishlab chiqaruvchilardan biri bo‘lib, kompaniyada 50 mingdan ortiq ishchi-xodim faoliyat yuritadi. Uning ishlab chiqarish infratuzilmasi O‘zbekistondagi 12 dan ortiq yirik kon va 10 ta qayta ishlash korxonasini o‘z ichiga oladi.