Hormuz bo‘g‘ozi yaqinida snaryadlar bilan hujumga uchragan ikkita kema cho‘kib ketdi. Hodisalardan birida ekipaj a’zolaridan biri halok bo‘lgan, ikkinchi kemadagi 21 nafar dengizchi esa evakuatsiya qilingan. Bu haqda Reuters agentligi xabar berdi.

Ma’lum qilinishicha, Singapur bayrog‘i ostida suzgan GFS Pride konteyner tashuvchi kemasi 13-oktyabr kuni Hormuz bo‘g‘ozi orqali harakatlanayotganda snaryad hujumiga uchragan. Kema shikastlanib, bortida yong‘in chiqqan va keyinchalik cho‘kib ketgan. Singapur dengiz va port ma’muriyati ma’lumotiga ko‘ra, ekipajning 21 nafar a’zosi xavfsiz evakuatsiya qilingan, hech kim jarohatlanmagan.

Antigua va Barbuda bayrog‘i ostida suzgan Cape Dao quruq yuk tashuvchi kemasi esa 23-sentabr kuni hujumga uchragan. BMTning Xalqaro dengiz tashkiloti ma’lumotiga ko‘ra, kema 14-oktyabr kuni Hormuz bo‘g‘ozi yaqinida cho‘kib ketgan. Hujum vaqtida ekipajning bir a’zosi halok bo‘lgan, qolganlari evakuatsiya qilingan.

Reuters ma’lumotiga ko‘ra, GFS Pride va Cape Dao AQSH va Eron o‘rtasidagi urush 28-fevralda boshlanganidan beri cho‘kkan ikkinchi va uchinchi kemalar bo‘lgan. So‘nggi kunlarda Hormuz bo‘g‘ozi atrofida tijorat kemalariga hujumlar ko‘paygani qayd etilmoqda.

Hormuz bo‘g‘ozi jahon energetika savdosida muhim o‘rin tutadi. Urushdan oldin dunyo bo‘yicha neft va suyultirilgan tabiiy gaz savdosining qariyb beshdan bir qismi ushbu yo‘nalish orqali amalga oshirilgan. Hududda kemalarga hujumlar kuchayishi xalqaro energetika ta’minoti xavfsizligi yuzasidan xavotirlarni oshirmoqda.