Hodisa 30 sentyabr kuni Dubaydan Tel-Avivga uchayotgan FZ 1073 reysi bortida yuz bergan. Dastlabki ma’lumotlarga ko‘ra, ikkinchi pilot kabinada kapitan Machchharga hujum qilgan. To‘qnashuv vaqtida samolyot boshqaruvini yo‘qota boshlagan.

Machchharning aytishicha, u og‘ir jarohatlanganiga qaramay, qarshilik ko‘rsatishda davom etgan. Chunki u vaziyat nazoratdan chiqsa, bortdagi barcha yo‘lovchilar hayoti xavf ostida qolishini tushungan.

“Men o‘sha paytda hayotim uchun kurashayotgan edim. Og‘ir jarohat olib, yiqilib tushdim. O‘shanda xayolimdan: ‘Agar yana oyoqqa tura olmasam-chi?’ degan fikr o‘tdi”, — dedi uchuvchi Hindiston bosh vaziri Narendra Modi bilan videomuloqotda.

“Samolyot pastga sho‘ng‘iyotganini his qildim”

17 yildan beri parvoz qilayotgan, shundan 11 yil davomida havo kemasi komandiri bo‘lib ishlagan Machchhar samolyotdagi vaziyatni kabina polida yotgan holatda ham anglaganini aytdi.

Uning so‘zlariga ko‘ra, samolyot pastga sho‘ng‘iy boshlaganini sezgan va vaziyatning oqibati qanday bo‘lishini tushungan.

“Polda yotganimda samolyot pastga sho‘ng‘iyotganini his qildim. Buning nima bilan yakunlanishini tushunib turardim. Eshik juda yaqin edi. Meni kaltaklashda davom etishayotganiga qaramay, eshikni ochdim. Shundan so‘ng ichkariga boshqalar kirib keldi”, — dedi u.

Kapitan yo‘lovchilarning harakatlari ham hodisaning og‘ir oqibatlar bilan yakunlanishining oldini olishda muhim bo‘lganini ta’kidladi.

“Ularning voqeadagi roli menikidan kam bo‘lmadi. Men o‘z hayotimni saqlab qolish uchun harakat qildim. Ammo shuncha odamning halok bo‘lishiga yo‘l qo‘ya olmasligimni ham tushunardim”, — dedi Machchhar.

Samolyot Saudiya Arabistoniga qo‘ndi

Voqea vaqtida bir necha yo‘lovchi kabinaga kirib, hujumchini zararsizlantirishga uringan. Keyinchalik samolyot boshqaruvini bortdagi boshqa uchuvchilar o‘z zimmasiga olgan.

Havo kemasi Saudiya Arabistoniga favqulodda qo‘ndirildi. Og‘ir jarohatlangan Machchharga dastlab Saudiya Arabistonida tibbiy yordam ko‘rsatilgan. Keyinchalik u Abu-Dabidagi shifoxonaga olib o‘tilgan va davolanishni davom ettirmoqda.

Ma’lumotlarga ko‘ra, uchuvchi hodisa vaqtida ko‘p miqdorda qon yo‘qotgan va turli og‘ir jarohatlar olgan.

Ikkinchi pilot bo‘yicha tergov

Hujumda gumon qilinayotgan ikkinchi pilot ham Saudiya Arabistonidan BAAga olib o‘tilgan. Unga nisbatan terrorizm moddasi bo‘yicha tergov olib borilayotgani ma’lum qilingan.

BAA Prezidentining diplomatik masalalar bo‘yicha maslahatchisi Anvar Gargash hodisani “xavfli terrorchilik harakati” deb atagan.

Isroil bosh vaziri Binyamin Netanyaxu esa gumonlanuvchi Ummon fuqarosi ekanini bildirgan. Biroq uning shaxsi rasman oshkor qilinmagan. Hujum sababi, shuningdek, voqea vaqtida qanday qurol ishlatilgani ham hozircha rasman aniqlashtirilmagan.

Netanyaxu hujumchi pichoq yoki bolta ishlatgan bo‘lishi mumkinligini taxmin qilgan.

Hodisa tafsilotlari tekshirilmoqda

Voqeadan so‘ng samolyot bortidan olingan dastlabki foto va videolar ijtimoiy tarmoqlar hamda OAVda tarqalgan. Shuningdek, dastlab uchuvchilarning fuqaroligi va hodisaning sabablari bo‘yicha turli versiyalar ilgari surilgan.

Keyinchalik jarohatlangan kapitan Hindiston fuqarosi Smit Machchhar ekani ma’lum bo‘ldi.

Hozirda huquq-tartibot idoralari samolyot bortida yuz bergan voqeaning barcha tafsilotlarini, hujum sababi va gumonlanuvchining harakatlarini o‘rganmoqda.