Termiz shahrida Damas avtomobilida 21 nafar voyaga yetmagan bola olib ketilayotgani aniqlandi. Bolalar xususiy oilaviy bog‘cha tarbiyalanuvchilari bo‘lgan. Bu haqda Surxondaryo viloyati IIB JXX YHXB xabar berdi.

Ma’lum qilinishicha, avtomobil harakatlanayotgan vaqtda YPX xodimlari tomonidan to‘xtatilgan. Haydovchining aytishicha, bolalar 16-bog‘chaga olib ketilayotgan bo‘lgan. Ayrim bolalarning ota-onalari ularning shu tarzda tashilayotganidan xabardor bo‘lgan.

YPX xodimlari bir nechta yo‘lovchi avtomobilini to‘xtatib, bolalarni bog‘chaga yetkazgan. Holat yuzasidan haydovchiga nisbatan qonuniy chora ko‘rilgan. Muassasa mudirasiga esa bunday harakatning ehtimoliy oqibatlari tushuntirilgan.

To‘plangan hujjatlar Surxondaryo viloyati Maktabgacha va maktab ta’limi boshqarmasiga ma’lumot uchun yuborilgan. Avvalroq Jizzaxda ikkita Damas avtomobilida 28 nafardan bola tashilayotgani aniqlangani haqida xabar berilgandi.