O‘zbekistonda pedagoglar uchun poytaxt yoki viloyat markaziga borib, bir oylik majburiy malaka oshirish kursida o‘qish talabi bekor qilinadi. Uning o‘rniga kasbiy rivojlanish vaucherlari joriy etiladi.

Prezident Shavkat Mirziyoyev o‘qituvchilar malakasiga to‘xtalar ekan, bolalarning qiziqishi, dunyoqarashi va axborot olish xususiyati o‘zgarayotganini ta’kidladi. “Kecha samara bergan dars usuli bugun yetarli bo‘lmasligi mumkin. Shu sabab muallimning muntazam o‘qishi va o‘z ustida ishlashi zarur”, — dedi davlat rahbari.

Yangi tartibga ko‘ra, muallim toifa sinovidagi natijasiga qarab 18 soatdan 72 soatgacha ta’lim olish imkoniyatiga ega bo‘ladi. Pedagog malaka oshirish kursi va ta’lim oladigan joyni o‘zi tanlaydi.

Davlat rahbari ushbu o‘zgarish malaka oshirish jarayonini rasmiyatchilikdan amaliy ehtiyojga aylantirishi kerakligini ta’kidladi.