Jizzaxda yo‘ldan o‘tayotgan voyaga yetmagan qiz katta tezlikda kelayotgan avtomobil urib yuborishidan vafot etdi.

Ijtimoiy tarmoqlarda holat aks etgan video tarqalgach, Jizzax viloyati YHXB matbuot xizmati ushbu YTH 2025-yil 7-dekabr kuni Jizzax shahrida sodir bo‘lganini ma’lum qildi. Tarqalgan videolavhada yo‘lni piyodalar o‘tish joyidan kesib o‘tayotgan ikki qizdan birini katta tezlikda kelgan avtomobil urib, uchirib yuborgani aks etgan.

Voyaga yetmagan piyoda og‘ir tan jarohati olgan. Jarohatlangan qiz shifoxonaga yotqizilgan bo‘lsa-da, 2025-yil 20-dekabr kuni vafot etgan.

Dastlabki ma’lumotlarga ko‘ra, hodisa haydovchi tomonidan yo‘l harakati qoidalari buzilishi natijasida sodir etilgan. Mazkur holat yuzasidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘lishiga sabab bo‘lishi)bilan jinoyat ishi qo‘zg‘atilgan.

Ushbu moddaga ko‘ra, aybdor shaxs muayyan huquqdan mahrum qilib, 7 yilgacha ozodlikdan mahrum qilish bilan jazolanishi mumkin.

Ayni paytda gumon qilinuvchi qonunga muvofiq tartibda ushlangan. Jinoyat ishi bo‘yicha dastlabki tergov harakatlari olib borilmoqda.

• Jizzax
• Piyoda
• YTH