Istiqbolli loyihalar milliy agentligi direktorining joriy yil 15-avgustdagi buyrug‘i bilan Kripto-birjada kripto-aktivlar savdolarini amalga oshirish qoidalari tasdiqlandi.

Qoidalar Prezidentning 27.07.2017 yildagi “O‘zbekiston Respublikasi Istiqbolli loyihalar milliy agentligi faoliyatini tashkil etish to‘g‘risida”gi PQ-3150-son qaroriga muvofiq ishlab chiqilgan.

Nizomda quyidagilar belgilangan:

• mijozlar bilan munosabatlarni o‘rnatish tartibi;
• kripto-aktivlar savdolarini tashkil etish tartibi;
• mijozlar bilan vositachilik munosabatlari asosida bitimlar tuzish tartibi;
• kripto-birjada hisob-kitob-kliring operasiyalarini o‘tkazish tartibi;
• kliring xizmati ko‘rsatishni to‘xtatish.

Kripto-birja mijozlarining pul mablag‘lari va kripto-aktivlari kripto-birjaning pul mablag‘lari va kripto-aktivlaridan alohida hisobga olinadi va saqlanadi. Savdolar ishtirokchilari majburiy identifikasiyadan o‘tkazilganidan so‘ng ularga kripto-birja elektron platformasi orqali operasiyalarni amalga oshirishga ruxsat beriladi.

Kripto-birja kripto-aktivlar savdolari bilan bog‘liq bitimlar ustidan doimiy nazoratni amalga oshiradi. Kripto-birja tomonidan qonunchilik hujjatlari va mazkur Qoidalarning buzilganligi aniqlanganda, ularni to‘xtatish hamda kelgusida qaytarilmasligi bo‘yicha choralar ko‘rilishi lozim.

O‘zbekiston rezidentlari kripto-birjaning elektron platformasida:

• kripto-aktivlar bilan kripto-birjada kripto-aktivlar savdolarining barcha turlarini milliy valyutada, jumladan kripto-aktivlarni to‘g‘ridan-to‘g‘ri savdolar maydonchasida sotish va sotib olishga qaratilgan bitimlarni amalga oshirish;
• O‘zbekiston norezidentlari bilan faqatgina kripto-aktivlarni sotishga doir operasiyalarni xorijiy valyutada amalga oshirish huquqiga ega;
• cotib olish ob’yekti sifatida kripto-aktivlarni tanlash huquqiga ega va bu tanlovning tegishli oqibatlari sotib oluvchining o‘z tavakkalchiligi hisoblanadi.

O‘zbekiston rezidentlari tomonidan o‘zaro o‘zgarmas tokenlarni xorijiy kripto-birjalar va platformalarda ayirboshlanganligi natijasida qabul qilingan kripto-aktivlar o‘rnatilgan tartibda O‘zbekiston hududida ro‘yxatdan o‘tgan kripto-aktivlar aylanmasi sohasidagi xizmatlar provayderlarining elektron platformalarida sotiladi.

Kripto-birjalarda barqaror tokenlarni chiqarish va chiqarishni ro‘yxatga olish, tokenlarni dastlabki taklifini joylashtirish maqsadida ta’minlanmagan tokenlarni chiqarish, chiqarishni ro‘yxatdan o‘tkazish, joylashtirish va muomalaga kiritish taqiqlanadi. Kripto-birja mijozlar bilan munosabatlarni shartnoma asosida o‘rnatadi.

Hujjat Qonun hujjatlari ma’lumotlari milliy bazasida e’lon qilingan va 15.08.2022 yildan kuchga kirgan.

• Kriptovalyuta
• bitcoin