Ispaniya La Ligasining 17-turi doirasida “Real Madrid” o‘z maydonida “Sevilya”ni ishonchli 2:0 hisobida mag‘lub etdi. Bahs “Bernabeu” stadionida bo‘lib o‘tdi.

Uchrashuvda hisob 38-daqiqada jarima zarbasidan so‘ng kiritildi. Mezbonlar hujumchisi Rodrigo uzatgan to‘pni yarim himoyachi Jud Bellingem boshi bilan darvozaga joylab qo‘ydi. 86-daqiqada Kilian Mbappe penaltini aniq amalga oshirib, “qaymoqranglilar”ning ikkinchi goliga mualliflik qildi. Ushbu hisob o‘yin yakuniga qadar saqlanib qoldi. Shu tariqa fransiyalik 27 yoshli futbolchi 2025-yilda “Real” safida 59-golini urdi va Krishtianu Ronalduning 2013-yilda o‘rnatgan rekordini takrorladi.

Ma’lumot uchun, Mbappe 2024-yilda “Real Madrid”ga ko‘chib o‘tgandi. U joriy mavsum barcha musobaqalar doirasida 27 o‘yinda maydonga tushib, 30 ta gol va 4 ta golli uzatmaga mualliflik qildi. Shuningdek, La Liga joriy mavsumida 18 gol bilan musobaqa to‘purari bo‘lib turibdi.

Fransuzning klub bilan amaldagi shartnomasi 2029-yilga qadar mo‘ljallangan. Transfermarkt portaliga ko‘ra, Kilianning yangilangan bozor qiymati 200 million yevroni tashkil etmoqda.

• Mbappe
• Real
• Ronaldu
• rekord