Mo‘g‘uliston prezidenti Uxnaagiin Xurelsux prokuratura va hukumatdan namoyishchilarning asosiy talabini bajarishni va mamlakatning asosiy eksport mahsuloti bo‘lgan ko‘mirning yirik hajmdagi o‘g‘irlanishi bo‘yicha ishni tergov qilish masalasini hal qilishni talab qildi. Bu haqda u Ulan -Batorda Vazirlar Mahkamasi aʼzolari, prezident maʼmuriyati, Bosh prokuratura rahbariyati va huquq-tartibot idoralari vakillari bilan boʻlib oʻtgan uchrashuvda maʼlum qildi.

Prezidentning ta'kidlashicha, to‘rt kundan beri namoyishlar davom etmoqda, biroq hukumat va huquq-tartibot idoralari hozirgacha namoyishchilar talablarini qondirish bo‘yicha aniq choralar ko‘rmayapti.

Shuningdek, Uxnaagiin Xurelsux yig‘ilganlardan nega prokuratura yuqori martabali korruptsionerlar nomini oshkor etmagani haqida so‘radi. Davlat rahbari, shuningdek, tergov talabiga ko‘ra, jinoyatga aloqador deputatlar daxlsizlikdan mahrum etilishi mumkinligini eslatdi.

U yig‘ilish ishtirokchilarini norozilik masalasini tezroq hal qilishga chaqirdi.

Avvalroq Mo‘g‘uliston parlamenti ko‘mir o‘g‘irlanishida aybdorlar nomini oshkor etish niyatida ekani xabar qilingandi.

• Mo‘g‘uliston
• Namoyish