Namangandagi yashirin omborxonadan 1,4 mlrd so‘mlik noqonuniy dorilar topildi

Namangan shahridagi xonadonlardan birida qiymati qariyb 1,4 milliard so‘m bo‘lgan noqonuniy dori vositalari saqlanayotgani aniqlandi.

Ma’lum qilinishicha, Davlat xavfsizlik xizmati, Bojxona qo‘mitasi hamda Ichki ishlar organlari xodimlari hamkorligida o‘tkazilgan tezkor tadbir davomida 2003-yilda tug‘ilgan shaxsning yashash manzili ko‘zdan kechirildi.

Tekshiruv natijasida xonadondagi yashirin omborxonadan xorijda ishlab chiqarilgan, tegishli sifat sertifikatiga ega bo‘lmagan 28 turdagi 28 928 dona dori vositasi aniqlandi. Ular orasida “Ortofen”, “Neyroks”, “Tirozol”, “Siofor” hamda boshqa preparatlar bor. Barcha dori vositalari protsessual tartibda rasmiylashtirib olindi.

Dastlabki hisob-kitoblarga ko‘ra, mamlakatga noqonuniy yo‘llar bilan olib kirilgan ushbu dori vositalarining umumiy qiymati 1,4 milliard so‘mni tashkil etadi.

Hozirda dori vositalari yuzasidan ekspertiza tayinlangan bo‘lib, holat bo‘yicha surishtiruv ishlari davom etmoqda.