Davlat ekologik nazorat inspeksiyasi tomonidan Ichki ishlar, Milliy gvardiya hamda Favqulodda vaziyatlar vazirligi xodimlari bilan hamkorlikda Navoiy viloyatida navbatdagi nazorat reyd tadbiri o‘tkazildi.

Olib borilgan reyd tadbiri davomida Navoiy viloyati Qiziltepa tumanida joylashgan “To‘dako‘l” tabiiy suv havzasida 3 nafar fuqaro tomonidan taqiqlangan baliq ovlash quroli bo‘lgan “leskali to‘rlar”  yordamida jami ikki turdagi 39 dona baliq noqonuniy ovlangani aniqlangan. Bu haqda Ekologiya va iqlim o‘zgarishi milliy qo‘mitasi xabar berdi.

Sodir etilgan huquqbuzarlik natijasida hayvonot dunyosiga 120 mln 304 ming so‘m miqdorida zarar yetkazilgani aniqlangan.

Shuningdek, yana bir holatda “To‘dako‘l” suv havzasida jami 5 turdagi 417 dona baliq noqonuniy ovlangani aniqlanib, ushbu holat oqibatida hayvonot dunyosiga 561 mln 968 ming so‘m zarar yetkazilgani ma’lum bo‘ldi. Holat yuzasidan hozirda surishtiruv ishlari olib borilmoqda.

Mazkur sodir etilgan holatlar yuzasidan huquqbuzarlarga tegishli bo‘lgan uzunligi 300 metr “leskali to‘rlar” va umumiy og‘irligi 416 kg bo‘lgan besh turdagi 456 dona baliqlar daliliy ashyo sifatida olib qo‘yilgan.

Hozirda nazorat reyd tadbirlari davom ettirilmoqda.

• Baliq
• Davlat ekologiya qo'mitasi
• Navoiy
• Qoidabuzarlik