O‘zbekistonda “Bitiruvchilar sifati indeksi” natijalariga ko‘ra, eng yuqori ko‘rsatkich qayd etgan 20 ta oliy ta’lim muassasasi ro‘yxati e’lon qilindi. Bu haqda Ta’lim sifatini ta’minlash milliy agentligi ma’lum qildi.

Top-20 talik oliygohlar to‘rt yo‘nalish — ijtimoiy-gumanitar, amaliy, tibbiyot, ijod va sport fanlari bo‘yicha shakllantirilgan.

Yo‘nalishlar kesimida eng yuqori natija qayd etgan oliygohlar quyidagilar:

• Ijod va sport: O‘zbekiston davlat konservatoriyasi — 81,5 ball, uning Nukus filiali — 79,6 ball;

• Ijtimoiy-gumanitar fanlar: Toshkent shahridagi Webster universiteti — 76,3 ball, Osiyo xalqaro universiteti — 73,4 ball, Xalqaro Nordik universiteti — 72,1 ball;

• Amaliy fanlar: Toshkent shahridagi Inha universiteti — 74,2 ball, Navoiy davlat konchilik va texnologiyalar universiteti — 72,4 ball, Olmaliq davlat texnika instituti — 69,1 ball;

• Tibbiyot fanlari: Toshkent davlat tibbiyot universitetining Termiz filiali — 74,0 ball, Farg‘ona jamoat salomatligi tibbiyot instituti — 64,0 ball.

Umumiy ko‘rsatkichlar bo‘yicha eng yuqori natijani O‘zbekiston davlat konservatoriyasi qayd etgan — 81,5 ball.

Ta’lim sifatini ta’minlash milliy agentligi mazkur indeks natijalari ish beruvchilar uchun bitiruvchilar tayyorgarligi va ta’lim sifati bo‘yicha muhim ko‘rsatkichlardan biri bo‘lib xizmat qilishini qayd etdi.

Avvalroq agentlik ma’lumotlariga ko‘ra, bitiruvchilarning o‘rtacha oylik ish haqi 4,9 million so‘mni tashkil etgani, oliygohni tamomlaganlardan ishga joylashishgacha bo‘lgan o‘rtacha muddat esa 2 oy 27 kun ekani ma’lum qilingan.