Joriy yilda O‘zbekistonda birinchi sinfga 800 ming bola qabul qilindi. Bu ko‘rsatkich o‘tgan yilga nisbatan 10 foiz ko‘p. 2030-yilga borib, birinchi sinf o‘quvchilari soni 1 million nafarga yetishi kutilmoqda.

Prezident Shavkat Mirziyoyev o‘quv yuklamasi yuqori bo‘lgan 52 ta tumanda xususiy maktablar ochishni qo‘llab-quvvatlash bo‘yicha yangi moliyaviy mexanizmlarni e’lon qildi. Ushbu hududlarda maktab tashkil etish uchun 7 yil muddatga 10 foizli imtiyozli kredit beriladi. Shuningdek, maktabni ochish va jihozlash xarajatlarining 15 foizigacha, biroq ko‘pi bilan 1,5 milliard so‘m subsidiya ajratiladi.

Binosini maktabga ijaraga berganlarga yer va mol-mulk solig‘i bo‘yicha imtiyoz beriladi. Barcha tumanlarda bo‘sh davlat binolari xususiy maktab tashkil etish uchun 10 yilga bepul ijaraga beriladi. Xalqaro akkreditatsiyadan o‘tish xarajatlarining yarmi qoplab beriladi.

Farzandi xususiy maktabda o‘qiydigan ota-onalar uchun soliq olinmaydigan daromad chegarasi 3 million so‘mdan 6 million so‘mga oshiriladi. Bu oilalarga yiliga 6–7 million so‘m tejash imkonini beradi. Soliq idoralari to‘lovlarni har oy yakunida avtomatik qaytarish tizimini yo‘lga qo‘yadi.

Shuningdek, har yili investitsiya dasturlari hisobidan 180–200 ming o‘quvchi o‘rni yaratilayotgani qayd etildi.