Loyihaga ko‘ra, banklar, to‘lov tashkilotlari va to‘lov tizimlari operatorlarining antifrod tizimlari 24/7 rejimida va real vaqt davomida ishlashi kerak bo‘ladi. Operatsiyalar bir nechta belgi kombinatsiyasi hamda skoring asosida baholanadi. Xavf darajasiga qarab to‘lov amalga oshiriladi, vaqtincha to‘xtatiladi va mijozdan tasdiq olinadi yoki rad etiladi.

Yangi tartib mobil ilovalar, internet-banking, bank kartalari va elektron hamyonlardan foydalanishda yuzaga keladigan firibgarlik xatarlarini aniqlashga qaratilgan. Jumladan, mijozni aldash yoki uning ishonchidan foydalanish orqali operatsiya amalga oshirilishiga undaydigan ijtimoiy muhandislik sxemalarini aniqlashga alohida e’tibor qaratiladi. Shubhali operatsiya to‘xtatilsa yoki rad etilsa, mijoz darhol mavjud aloqa kanallari orqali xabardor qilinadi.

Loyihada antifrod modellarini muntazam baholash, ijtimoiy muhandislik alomatlari aniqlanganda qo‘shimcha verifikatsiya o‘tkazish, moliya bozori ishtirokchilari o‘rtasida shubhali operatsiyalar va yangi firibgarlik sxemalari haqida axborot almashish talablari ham nazarda tutilgan. Markaziy bank ma’lumotiga ko‘ra, 2026-yilning birinchi yarmida O‘zbekistondagi tijorat banklarida qiymati 461 milliard so‘mdan ortiq 18 milliondan ziyod firibgarlik operatsiyasining oldi olingan.