Prezident Shavkat Mirziyoyev “Bog‘cha bolaning qobiliyati kashf etiladigan, zehni ochiladigan maskanga aylanishi zarur”, — dedi. Ta’kidlanishicha, Italiya, Buyuk Britaniya, Germaniya, Singapur va Xitoy tajribasi asosida milliy qadriyatlarga mos dastur ishlab chiqilgan. Hozirda 180 ming tarbiyachi va pedagog yangi metodika bo‘yicha o‘qitilmoqda.

Toshkent shahrida UNESCO shafeligida Bolalarni erta yoshdan ta’limga jalb qilish mintaqaviy markazi hamda Italiyaning Rejjio Emiliya markazi ish boshladi. Ular xalqaro standartlar va innovatsion yechimlarni joriy etish, shuningdek, o‘yin orqali ta’lim berish bo‘yicha amaliy qo‘llanmalar tayyorlashga xizmat qiladi.

Shuningdek, har yili 50 nafar ilg‘or tarbiyachi xorijda stajirovka o‘tashi, barcha bog‘chalar uchun 100 ta videokontent tayyorlanishi belgilangan. Uch yillik dastur doirasida davlat bog‘chalari elektron doska, kompyuter va rangli printerlar bilan jihozlanadi.