Tarmoqda “grumpygran1948” taxallusi bilan tanilgan pensioner muntazam ravishda jonli efirga chiqib, Fortnite’dagi o‘yin jarayonlarini translyatsiya qiladi. Uning kanaliga ayni paytda 24 mingdan ortiq kishi obuna bo‘lgan.

Ket Boui kompyuter o‘yinlariga to‘qqiz yil avval nevarasi sabab qiziqib qolgan. Nevarasi uning o‘yin translyatsiyalarini tomosha qiladiganlar topilishiga shubha bildirganidan so‘ng, Ket buning aksini isbotlashga qaror qilgan. U hozir har kuni sevimli o‘yini qarshisida bir necha soat vaqt o‘tkazadi.

Qayd etilishicha, Ket Bouiga yoshlar hamjamiyati bilan muloqot qilish va o‘yindagi murakkab sinovlarni bajarish yoqadi. Uning hikoyasi Ginnesning rekordlar kitobining videoo‘yinlarga bag‘ishlangan yangi soniga kiritiladi. Rekordchi esa yoshga e’tibor bermasdan, yangi mashg‘ulotlarni sinab ko‘rish hech qachon kech emasligini ta’kidlagan.