O‘zbekiston PISA 2025 xalqaro tadqiqotida 91 ta davlat va ta’lim tizimi qatorida ishtirok etdi. Mamlakat mazkur xalqaro baholash dasturida ikkinchi bor qatnashmoqda.

PISA — Iqtisodiy hamkorlik va taraqqiyot tashkiloti (OECD) tomonidan o‘tkaziladigan xalqaro tadqiqot bo‘lib, u 2000-yildan buyon har uch yilda bir marta o‘tkazib kelinadi.

PISA 2025 natijalariga ko‘ra, O‘zbekiston o‘quvchilari tabiiy fanlar bo‘yicha 438 ball to‘plab, 91 ta davlat va ta’lim tizimi orasida 48-o‘rinni egallagan.

Taqqoslash uchun, PISA 2022 tadqiqotida O‘zbekistonning tabiiy fanlar bo‘yicha natijasi 355 ball va 80-o‘rinni tashkil etgan. Shu tariqa, 2025-yilda mazkur yo‘nalishdagi natija 83 ballga oshgan.

PISA 2025 tadqiqoti uchun OECD tomonidan O‘zbekistonda tasodifiy reprezentativ tanlov asosida 233 ta maktab tanlangan. Unda 15 yoshli 8 652 nafar o‘quvchi ishtirok etgan.

2022 yilgi tadqiqotda esa O‘zbekistonning 202 ta maktabidan 7 293 nafar o‘quvchi qatnashgan. Demak, bu safar tadqiqotga jalb etilgan maktablar va o‘quvchilar soni ham oshgan.

PISA tadqiqotida o‘quvchilarning matematika, tabiiy fanlar, o‘qish va raqamli savodxonlik bo‘yicha bilim va ko‘nikmalari baholanadi. PISA 2025da esa tabiiy-ilmiy savodxonlik asosiy baholash yo‘nalishi sifatida belgilangan.

O‘zbekistonning tabiiy fanlar bo‘yicha natijasi avvalgi tadqiqotga nisbatan sezilarli oshgani mamlakat ta’lim tizimidagi ijobiy o‘zgarishlardan biri sifatida qayd etilmoqda.