AQSh Mudofaa vazirligi 30 yosh va undan katta harbiy xizmatchilarda testosteron yetishmovchiligini majburiy tekshirishni nazarda tutuvchi yangi klinik qo‘llanmani vaqtincha bekor qildi.

Pentagon mazkur qo‘llanmani 2-sentabr kuni e’lon qilgan edi. Biroq oradan bir kun o‘tib, hujjat hamda vazirlik matbuot kotibi Shon Parnellning unga hamroh bayonoti rasmiy saytdan olib tashlandi.

AQSH rasmiysi qo‘llanma “yangilanishlar kiritish uchun vaqtincha bekor qilinganini” ma’lum qildi. Uning so‘zlariga ko‘ra, hozircha avvalgi vaqtinchalik ko‘rsatmalar amalda qoladi.

Yangi qoidalar faol xizmatdagi va zaxiradagi 30 yoshdan katta harbiy xizmatchilarni har yilgi tibbiy ko‘rik doirasida testosteron yetishmovchiligi bo‘yicha tekshirishni nazarda tutgan edi. Hujjatda testosteron darajasining pastligi harbiy xizmatchilarning jismoniy bardoshi va jangovar tayyorgarligiga salbiy ta’sir ko‘rsatishi mumkinligi qayd etilgan.

Qo‘llanmaga ko‘ra, erkak harbiylar dastlab maxsus so‘rovnomadan o‘tkazilishi, zarurat tug‘ilganda esa qon tahlili orqali testosteron darajasi tekshirilishi kerak edi. Testosteron yetishmovchiligi aniqlangan holatlarda gormonal davolash masalasi ham ko‘rib chiqilishi belgilangan.

Ayol harbiylar uchun esa tekshiruv gormonal o‘zgarishlar bilan bog‘liq holatlar, jumladan, charchoq va hayz siklidagi o‘zgarishlarni baholashni o‘z ichiga olgan. Gormonal terapiya faqat muayyan tibbiy holatlarda tavsiya etilishi ko‘zda tutilgan.

Mazkur tashabbus AQSH Mudofaa vaziri Pit Xegset tomonidan ilgari surilgan edi. Uning asosiy maqsadi harbiy xizmatchilar salomatligini yaxshilash orqali qo‘shinlarning jangovar tayyorgarligini oshirish ekani ta’kidlangan.

Biroq yangi tartib tibbiyot mutaxassislari tomonidan tanqid qilindi. Ayrim ekspertlarning fikricha, 30 yoshdan katta barcha harbiy xizmatchilarni testosteron yetishmovchiligi bo‘yicha majburiy tekshirish zarurati yetarlicha ilmiy asoslanmagan.

Mutaxassislar, shuningdek, testosteron terapiyasidan ortiqcha foydalanish yurak-qon tomir tizimi bilan bog‘liq muammolar va bepushtlik kabi xavflarni keltirib chiqarishi mumkinligidan ogohlantirdi.

Shu bilan birga, ayrim shifokorlar yangi yondashuvni qo‘llab-quvvatladi. Ularning ta’kidlashicha, testosteron va boshqa gormonlar bilan bog‘liq muammolarni erta aniqlash harbiy xizmatchilarda ayrim kasalliklarni o‘z vaqtida aniqlash va davolashga yordam berishi mumkin.

AQSH Oziq-ovqat va dori vositalari boshqarmasi (FDA) sentabr oyining o‘rtalarida testosterondan tibbiy maqsadlarda foydalanish masalasini muhokama qilish uchun yig‘ilish o‘tkazishi kutilmoqda.

Pentagon yangi klinik qo‘llanma qachon qayta e’lon qilinishi yoki unga qanday o‘zgartirishlar kiritilishi haqida hozircha aniq ma’lumot bermagan.