FIFA Intizom qo‘mitasi AQSH milliy terma jamoasi hujumchisi Folarin Balogunni Jahon chempionati 1/8 finalida Bosniya va Gersegovinaga qarshi o‘yinda sodir etgan qoidabuzarligi hamda o‘yin yakunidagi harakatlari uchun 40 ming dollar jarimaga tortdi. Balogun uchrashuvning 64-daqiqasida raqib himoyachisi Tarik Muharemovichning to‘pig‘iga zarba bergani uchun VAR tekshiruvidan so‘ng to‘g‘ridan to‘g‘ri qizil kartochka olgan. Bahs AQSHning 2:0 hisobidagi g‘alabasi bilan yakunlangan.

Shunga qaramay, futbolchi qizil kartochka olganiga qaramasdan, o‘yin tugagach jamoadoshlari bilan g‘alabani nishonlash uchun maydonga qaytgan. FIFA ma’lumotiga ko‘ra, jarimaning: 20 ming dollari — g‘alabani nishonlash tartibini buzganligi; yana 20 ming dollari — qizil kartochkadan keyingi chetlatish tartibiga rioya qilmaganligi uchun qo‘llanilgan. Jurnalist Rob Harrisning ma’lum qilishicha, jarimaning 20 ming dollarini AQSH futbol federatsiyasi to‘lab beradi.

Dastlab Balogun Belgiyaga qarshi keyingi uchrashuvni o‘tkazib yuborishi kerak edi. Biroq FIFA Intizom qo‘mitasi uning bir o‘yinlik diskvalifikatsiyasini bir yillik sinov muddati bilan to‘xtatib qo‘ydi. Bu qaror futbol jamoatchiligida keskin bahslarga sabab bo‘ldi. Belgiya futbol assotsiatsiyasi uni “misli ko‘rilmagan” va “tushunarsiz” qaror deb atagan bo‘lsa, terma jamoa bosh murabbiyi Rudi Garsiya bu holatni “1-aprel hazili”ga qiyosladi. Keyinchalik belgiyaliklarning apellyatsiyasi FIFA tomonidan rad etildi.