AQSHda mamlakatning mustaqilligining 250 yilligiga bag‘ishlangan, Donald Tramp tasviri tushirilgan 1 dollarlik tanga muomalaga chiqarildi.

Mazkur tanga esdalik sifatida emas, balki kundalik foydalanish uchun mo‘ljallangan. Ya’ni undan oddiy xaridlar vaqtida to‘lov vositasi sifatida foydalanish mumkin.

Tilla rangli tanganing bir tomonida Donald Tramp portreti, shuningdek, “Liberty” (“Ozodlik”) va “In God We Trust” (“Biz Xudoga ishonamiz”) yozuvlari aks etgan. Ikkinchi tomonida esa qalqonida “250” raqami tasvirlangan AQSH prezidentining muhrini ko‘rish mumkin.

AQSH zarbxonasi ma’lumotlariga ko‘ra, yangi tangalar mamlakat mustaqilligining 250 yilligi arafasida millatning ruhi, g‘ururi va tarixiy merosini aks ettiradi.

Qayd etilishicha, AQSHda qariyb 100 yil davomida tirik prezident yoki boshqa tirik shaxsning surati pul birliklariga tushirilmagan. Shu sababli Trampning portreti aks etgan tanganing muomalaga chiqarilishi jamoatchilik va mutaxassislar orasida keskin bahs-munozaralarga sabab bo‘ldi.

An’anaga ko‘ra, AQSH pul birliklarida, odatda, vafot etgan davlat arboblari va tarixiy shaxslarning portretlari aks ettiriladi.