Bosh prokuratura tomonidan hududiy Davlat xizmatlari markazlaridan birining xodimlari hamda haydovchilik guvohnomalarini qalbakilashtirishda gumonlanayotgan boshqa shaxslarga nisbatan qo‘zg‘atilgan jinoyat ishi yuzasidan tergov harakatlari olib borildi.

Aniqlanishicha, Davlat xizmatlari markazi mutaxassisi jinoiy sheriklari bilan birgalikda joriy yil davomida transport vositasini boshqarish huquqiga ega bo‘lmagan fuqarolarga soxta haydovchilik guvohnomalarini rasmiylashtirib kelgan. U jami 72 nafar fuqarodan 616 million so‘m miqdorida pul olgan.

Jinoiy guruh qalbaki haydovchilik guvohnomalarini rasmiylashtirishda ikki xil usuldan foydalangan.

Birinchi holatda, 500–1000 AQSh dollari evaziga uchinchi shaxslar orqali eski namunadagi qalbaki haydovchilik guvohnomalari qo‘lbola usulda tayyorlanib, fuqarolarga berilgan. Shundan so‘ng, tuman Davlat xizmatlari markazi xodimiga pora berish orqali ushbu soxta guvohnomalar go‘yoki fuqarolar tomonidan taqdim etilgandek rasmiylashtirilib, ularga yangi haydovchilik guvohnomalari berilgan.

Ikkinchi holatda esa, 10 ming AQSh dollarigacha bo‘lgan mablag‘ evaziga fuqarolarning haydovchilik guvohnomasiga egaligi to‘g‘risidagi hududiy YHXB ma’lumotnomalari qalbaki imzo va QR-kodlar bilan tayyorlanib, fuqarolarga topshirilgan. Keyinchalik, tuman Davlat xizmatlari markazi xodimiga pora berish orqali ushbu QR-kodli soxta hujjatlar asosida yangi haydovchilik guvohnomalari rasmiylashtirilgan.

Bosh prokuratura tomonidan hududlarda o‘tkazilgan o‘rganishlar davomida 1200 dan ortiq qalbaki haydovchilik guvohnomalari aniqlangan. Ularning eng ko‘p qismi Toshkent shahrida — 440 ta holatni tashkil etadi.

Yuqoridagi barcha holatlar yuzasidan jinoyat ishlari qo‘zg‘atilgan. Fuqarolar tomonidan qalbaki hujjatlar asosida olingan haydovchilik guvohnomalari bekor qilingan.

• Bosh prokuratura
• Jinoyat
• Pora
• prava