Ramazon hayiti munosabati bilan 20-mart kuni Toshkent shahri jamoat transporti (avtobus va metropoliten) o‘z ish faoliyatini soat 4:00 dan boshlaydi. Bu haqda Transport vazirligi xabar bermoqda.

“Ushbu qaror jamoat transporti orqali hayit namozida ishtirok etishni rejalashtirayotgan fuqarolar uchun qulaylik yaratish, yo‘llarda tirbandliklarni oldini olish hamda bayramda sifatli, xavfsiz jamoat transporti xizmatini ko‘rsatish maqsadida qabul qilindi”, — deyiladi xabarda.

O‘z navbatida, “Toshkent metropoliteni” DUK ham shu mazmundagi xabarni tarqatdi. Shuningdek, bayram kunlarida poyezdlar harakati quyidagi tartibda tashkil etilishini bildirdi:

20−21-mart kunlari harakat shanba kuni uchun belgilangan jadval asosida;

22−23-mart kunlari esa yakshanba kuni uchun tasdiqlangan jadval asosida harakatlanadi.

Ma’lumot uchun, Ramazon hayiti va Navro‘z bayramida haftasiga 5 kun ishlaydiganlar 4 kun, ya’ni 20−23-mart sanalarida, haftasiga 6 kun ishlaydiganlar 3 kun, ya’ni 20−22-mart sanalarida dam oladi.

• Hayit
• Jamoat transporti
• Ramazon